"Футболни унут, у сенинг қорнингни тўйдирмайди" – бир пайтлар Криштиану Роналдуга ўқитувчиси шундай маслаҳат берган экан"

...Ижтимоий тармоқлардан бирида шу иқтибосни кўриб қолдим. Бу қанчалик рост ё тўқиб чиқарилганми билмадиму, аммо, рост бўлса ўқитувчисининг адашганини бугун ҳеч кимга исботлаб ўтиришнинг ҳожати йўқ ва айнан шундай иқтибосларнинг (рост ё тўқиб чиқарилганидан қатъий назар) борлиги унинг нақадар машҳурлигидан ва миллионлаб мухлисларнинг назарида эканидан далолатдир.

Криштиану Роналду душ Сантуш Авейру

1985 йил 5 февралда Португалиянинг Фуншал шаҳрида туғилган, португалиялик футболчи.

Биография: онаси Марии Долореш душ Сантуш Авейру, отаси Жозе Диниша Авейру. Криштиану оилада тўртинчи фарзанд. Угу исмли акаси, Эльма ва Лилиана Катя исмли опалари бор. Лилиана Катя — қўшиқчи, «Ronalda» тахаллуси билан ижод қилади.

Роналду болалигида "Бенфика" клубининг мухлиси эди. Саккиз ёшида отаси ишлайдиган "Андоринья" ҳаваскор жамоасида тўп сура бошлади.

Биринчи шартнома: 1995 йили ўн ёшида маҳаллий "Насьонал" жамоаси билан шартнома имзолайди. Ўн икки ёшида "Спортинг" клубига ўтди.

16 ёшли Роналдунинг истеъдодини “Ливерпуль”нинг собиқ бош мураббийи Жерар Улье биринчи бўлиб пайқаган эди, аммо, “мерсисайдликлар” уни ҳали жуда ёш ва тажрибасини ошириши учун вақт керак, дея шартнома тузмади. 

Лекин 2003 йилнинг ёзида у “Манчестер Юнайтед”нинг ўша пайтдаги бош мураббийи сэр Алекс Фергюсоннинг назарига тушади. Ўшанда Лиссабонда “Жозе Алваладе” стадиони очилишида ўтказилган учрашувда «Спортинг» «Юнайтед»ни 3:1 ҳисобида мағлубиятга учратган эди.

У “Манчестер Юнайтед” билан 12,24 миллион фунт эвазига шартнома имзолади ва клуб тарихидаги биринчи португалиялик футболчи бўлди.

У шундай эслайди: «Клубга ўтгач мураббий мендан қайси рақам остида майдонга тушишни истаётганимни сўради. Мен 28-рақам, деб жавоб бердим. Лекин Фергюсон: Йўқ сен 7-рақамга эга бўласан. Чунки бу рақам Жорж Бест, Брайан Робсон, Эрик Кантона ва Дэвид Бекхэмники бўлган, - деди.”

Дебют: Роналду “Юнайтед” таркибида илк марта 2003 йилнинг 16 августида “Олд Траффорд”да “Болтон Уондерерс” қарши ўтказилган баҳсда захирадан майдонга тушди. Учрашув майдон эгаларининг 4:0 ҳисобидаги ғалабаси билан якунланди.

Биринчи гол: 2003 йилнинг 1 ноябрида “Портсмут” билан кечган баҳсда илк голини уради. Бу баҳс 3:0 ҳисобида якунланди.

Мингинчи гол: 2005 йилнинг 29 октябрида айнан Роналду “Манчестер Юнайтед”нинг Премьер лигадаги мингинчи голига муаллифлик қилди. Бу 1:4 ҳисобида якунланган “Мидлсбро” қарши учрашувда бўлган эди.

2009 йилнинг 11 июнида “МЮ” “Реал”нинг Роналдуни 93,4 миллион евро эвазига сотиш таклифини қабул қилди.

Тутинган ота: Роналду футболчи сифатида ўсишига катта ёрдам берган Фергюсонга миннатдорлик билдирар экан, шундай дейди: “ У менинг спортдаги отам ва айнан у менинг фаолиятимни белгилашда муҳим омил бўлди.

Яна ўша етти: Раулнинг “Реал”дан кетиши туфайли Роналдуга яна 7-рақам насиб этди.

Услуб: кўпчилик мутахассислар Криштиану Роналдуни дунёдаги ҳар томонлама мукаммал футболчи эканини эътироф этишади.У майдонда деярли барча нарсани қила олади, унинг икки оёқда берган зарбаси ғоят кучли ва аниқ чиқади, бош билан ҳам гол киритади. Роналду ноёб жарима тўпни тепиш қобилиятига эга. 

У тепган тўп у ўйлаган чизиқ бўйича ҳаракат қилади гўё, тезлик билан бораётган тўп аввалига юқорилаб, дарвоза олдида эса бирдан пастлаб тўрга бориб тушади. Шунингдек, у бир неча рақибни алдаб ўта оладиган яхши техника ва дриблингга эга. Шулар билан бир қаторда у жуда чидамли ва тезкор футболчидир.

Олтин тўп: Икки марта – 2008 йил (France Football) ва 2013йил (ФИФА) “Олтин тўп” соҳиби бўлди.

Миллий терма жамоа: Илк марта Евро-2004да у ўзини Португалия миллий терма жамоаси ўйинчиси сифатида намоён этди.

Евро голлар: Роналду учта Европа чемпионати (2004, 2008, 2012) ва иккита жаҳон чемпионатида (2006, 2010) рақиб дарвозасини ишғол қилган.

Бразилия-2014: Бу йилги мундиалга саралаш турнирида Роналду гуруҳ босқичида тўртта голга муаллифлик қилди ва якунда Португалия терма жамоаси гуруҳда иккинчи ўринни олиб, Швеция билан баҳс олиб боради. Дастлабки учрашувда Криштианунинг ягона голи ғалаба келтирган бўлса, жавоб ўйинида у хет-трик муаллифига айланди ва терма жамоасини жаҳон чемпионатига олиб чиқди.

Шахсий ҳаёт: Россиялик модель Ирина Шейк билан романтик муносабатларни ўрнатган. 2010 йили Роналду ота бўлди, унинг ўғли суррогат онадан дунёга келди.

Иқтибос:

“Роналду дунёдаги энг яхши футболчи...У ҳаммадан олдинда”

Алекс Фергюсон.