FAPL.uzда Англия (Премьер лига янгиликлари)

«Барселона» Алексис Санчесни «Арсенал»га 32 миллион еврога сотишга тайёр

ADMINSTRATOR — Sun, 06 Jul 2014 05:48:25 GMT

«Арсенал» клуби «Барселона» жамоаси билан ярим ҳимоячи Алексис Санчеснинг трансфери борасида музокаларни давом эттирмоқда.

Каталония клуби Чили термаси аъзосининг сотувидан 32 миллион евро ишлаб олмоқчи, дея хабар беради BBC телеканали.

Манбанинг маълумотига кўра, Санчес «Эмирейтс»га кўчиб ўтишга қарши эмас, аммо «Барселона» «Ливерпуль» ҳужумчиси Луис Суареснинг трансфери расмийлаштирмагунича, уни сотмайди.

Манба: www.bbc.co.uk

Фарид Мондрагон фаолиятини якунлади

ADMINSTRATOR — Sun, 06 Jul 2014 05:25:28 GMT

Бразилияда бўлиб ўтаётган Жаҳон чемпионатида мусобақаниинг финал қисмида иштирок этга н энг ёши катта футболчига айланган колумбиялик дарвозабон Фарид Мондрагон, фуболчилик фаолиятини якунлаганини эълон қилди.

Жаҳон чемпионнати бошланишидан аввал, 43 ёшли посбон, мазкур турнир у учун охиригиси бўлиши мумкинлигини айтган эди. Чорак финал баҳсида Бразилияга (1:2) мағлуб бўлгач эса, у ўз Instagramида бу ҳақда расман эълон қилди.

Мондрагоннинг сўнгги клуби «Депортиво Кали» бўлди.

Манба: www.Goal.com

Мессининг "бармоғи"ни синдиришди, Марадонага зарар етказишди

ADMINSTRATOR — Sun, 06 Jul 2014 05:23:19 GMT

Номаълум шахслар Буэнос-Айресдаги аргентиналик машҳур футболчи Лионель Мессининг ҳайкалидаги кўрсаткич бармоғини синдириб кетишган. Шаҳарнинг бадавлат Реколет туманидаги мажмуада яна икки аргентина футболи афсонаси - Диего Марадона ва Габриэль Батистуталарнинг ҳайкалларига ҳам зарар етказилган.

Бу ҳайкалда Месси ўзининг одатдаги голни нишошлаш ҳолати, икки кўрсаткич бармоғини баландга кўтарган ҳолда тасвирланганди. Ушбу ҳолат аниқланганидан сўнг полиция вандализм бўйича иш очган. Мазкур ҳайкаллар Бразилиядаги жаҳон чемпионати очилишидан бир ҳафта олдин Реколетда ўрнатилган эди.

Манба: FAPL.uz

Арьен Роббен: "Ван Гал – ҳақиқий сеҳргар"

ADMINSTRATOR — Sun, 06 Jul 2014 03:52:23 GMT

Голландия терма жамоаси футболчиси Арьен Роббен Коста-Рика устидан қозонилган ғалабадан сўнг Луи ван Галнинг қарори борасида гапириб ўтди.

• • •

"Футболчилардан ҳеч ким ван Галнинг мана шундай заҳира варианти борлигини билмаган эди. Бизнинг мураббий - ҳақиқий сеҳргар.

Биз пенальтига руҳий томонлама тайёр эдик", - дейди Роббен.

Эслатиб ўтамиз, 120-дақиқада заҳирадан майдонга туширилган дарвозабон Крул иккита пенальтини қайтаришга муваффақ бўлди.

Манба: sports.ru

Музокара давом этаётир

ADMINSTRATOR — Sun, 06 Jul 2014 03:47:51 GMT

«Барселона» «Ливерпуль» билан уругвайлик ҳужумчи Луис Суареснинг трансфери борасида музокараларнинг дастлабки босқичини ўтказди. Бош директор Иан Эйр бошчилигидаги инглиз клуби вакиллари Лондонда каталонияликлар техник директори Рауль Санльехи билан учрашишга рози бўлдилар. Бу ҳақда The Telegraph нашри хабар тарқатди.

Нашрнинг маълумотига кўра, «Ливерпуль» Суаресни 70-80 миллион фунт стерлингдан арзонга сотмоқчи эмас. Шу билан бирга, мерсисайдликлар «Барса» ярим ҳимоячиси Алексис Санчесга бўлган қизиқишни тасдиқладилар ва у келишувга қўшилишини истамоқдалар. Агарда музокаралар муваффақиятли якунланса, Суарес Каталония клуби сафида йилига 8-10 миллион евро маош олиши маълум бўлди.

Сўнгги маълумотларга қараганда эса “Барса” клуби “Ливерпуль” ҳужумчиси Луис Суаресга таклиф қилинаётган пул миқдорини 79,2 миллион еврогача оширди. Аввалроқ, каталонияликлар уругвайлик ҳужумчи учун 75 миллион евро таклиф қилишган экан.

Эслатиб ўтамиз, Суарес “Барселона”га ўтган тақдирда ҳам, октябрь ойига қадар майдонга туша олмайди. ФИФА уни 4 ойга футболдан четлатган.

Неймар машҳурлигига оид 9 та далил

ADMINSTRATOR — Sun, 06 Jul 2014 03:46:48 GMT

Машҳур бўлиш - осон эмас. Лекин бу мақомни кўтариб юриш - янада мушкулроқ. Sports.ru сайти томонидан аниқланган ва Неймарнинг Бразилияда нақадар машҳурлигини тасдиқлайдиган 9та далил бунга яққол исбот.

1. Комикслар

Неймар комикслар персонажига айланди. Бразилиялик мусаввир Маурисио де Соуза ўз ватандоши ҳақида 68 саҳифали ижод яратди. Ярим асрдан кўпроқ вақтни комикс чизишга бағишлаган ижодкор бор-йўғи 3 нафар футболчига мурожаат қилган: Пеле, Роналдиньо ва Неймар. Ҳар ойда чоп этилаётган Неймар комиксининг баҳоси 8 риалга тенг.

2. Маъбуд

Бразилиядаги машҳур Placar журнали ўз муқовасида Неймарни маъбуд тимсолида тасвирлаб, ҳужумчининг кучли босим ва танқидлардан азият чекканини ифода этганди. Бироқ Епископлар миллий конфедерацияси ижодий ишга муносиб баҳо бермади. Аксинча, журнални руҳонийларнинг ҳиссиётларини таҳқирлашда айблади. Неймарга эса норози оҳангдаги эътироз мактуби жўнатилди. Ҳужумчи бунга жавобан ўзининг эътиқодли руҳоний эканлиги ва ҳафтасига лоақал 3 марта черковга боришини маълум қилди.

3. Карнавал

Риода ташкил этилган сўнгги карнавал ташкилотчилари Неймарни бош қаҳрамон сифатида ташлашди. Сан-Гонсалода жойлашган фабрика футболчининг юзи қиёфасида минглаб турдаги ниқобларни ишлаб чиқарди.

4. Сурат

Рио-де-Жанейрода ташкил этилган граффит танловида Неймарнинг сурати ғолиб чиқди. Тўғри, бир неча кундан кейин сурат ЖЧнинг Бразилияда ўтказилишига норозилик билдирилаётган «Қора блок» аъзолари томонидан йўқ қилинди. Лекин шаҳарда футболчининг бошқа суратлари ҳам жуда кўп. Уларнинг бирида ҳужумчининг «Маракана» стадионига сиртдан бўса йўллаётгани тасвирланган. Гиннеснинг рекордлар китобидан жой олган мазкур аренада Бразилия термасининг 1950 йили Уругвайга тожни бериб қўйганига 199 854 нафар мухлис бевосита гувоҳ бўлганди.

5. Наркотиклар

Баҳорда наркотик моддаларнинг ноқонуний савдосига қарши рейд ўтказган Бразилия полицияси Неймарнинг «Барселона» футболкасидаги сурати туширилган қутичаларда гиёҳванд моддаларни қўлга олди. Наркобаронлар маҳсулотнинг юқори сифатини шу йўл билан ифодалашни маъқул кўришганди, чоғи.

6. МусиҚа

Неймарнинг фанатлари ҳужумчининг энг яхши 10та учрашувда тўпга зарба берган ҳолатидан сўнг чиққан овозлардан мусиқий тренк яратишди. Мисол учун, Неймарнинг «Барса» сафидаги илк «хет-трик»и, Япония билан бўлган ўйинда урган энг чиройли голи (Пушкаш мукофотига лойиқ кўрилган)дан кейинги вазиятлар жамланмаси асарнинг асосини ташкил этади.

7. Сайёҳлик

Бразилия сайёҳлик бизнесида янги йўналиш - Неймарнинг яшаш жойлари бўйлаб саёҳат йўлга қўйилди. Махсус автобус меҳмонларни аввал Неймар туғилиб ўсган Можи-дас-Крузис шаҳарчаси, кейин «Сантос» мактабига олиб боради. Афсуски, Барселонага тўғри, автобус билан боришнинг иложи йўқ.

8. ЎйинчоҚлар

Бразилияда болалар учун маҳсулотлар ишлаб чиқаришга ихтисослашган Gulliver компанияси Неймарга оид ўйинчоқларни чиқара бошлади. Янги йўналиш учун корхона ўз бюджетининг 8 фоизини сарфламоқда. Неймар - шундай шарафга лойиқ кўрилган иккинчи футболчидир. Ундан аввал компания табиийки, Пеле билан ҳамкорлик қилган.

9. неймаретка

Шубҳа йўқки, машҳур ҳужумчи ўзининг сон-саноқсиз мухлисаларидан аллақачон безиб улгурган. Шу сабабли уларга расман мурожаат қилишдан ўзга чора тополмади: «Ҳар 2 ҳафтада телефоним рақамини ўзгартирсам ҳам, улардан қутулолмаяпман. Ҳайронман, менинг рақамимни қандай топиб олишяпти? Эрталабдан қўнғироқлар ва SMS-хабарларга кўмилиб кетаман. Шунингдек, улар менинг яқинларим, дўстларим, ҳатто маъшуқамни тинч қўйишмаяпти. Турли бўҳтонларни тарқатишмоқда. Оқибатда қанчадан-қанча бегуноҳ кишилар телефон рақамини алмаштириш билан овора. Бундай машмашаларга чек қўйилишини истайман. Мени ҳурмат қиладиган, ўзини яқин оладиган ва самимий мухлислик қиладиганларга мурожаатим шу: агар сиз шундай бемаъничиликларни амалга ошираётганларни танисангиз, илтимос, уларни тўхтатиб қолинг. Қизлар бу номаъқул одатларини ташлашсин. Улар мени шунчаки, ноқулай аҳволга солиб қўйишяпти. Мени ортиқча безовта қилмасликларини илтимос қиламан!»

Родригеслар "бандаси"

ADMINSTRATOR — Sun, 06 Jul 2014 03:44:04 GMT

Колумбия миллий жамоаси ЖЧ-2014 доирасида 4 марта майдонга тушиб, шунча марта зафар қучди. Яъни ҳозирча мундиалда 100 фоизли натижа қайд этяпти. Табиийки, кўпчилик колумбияликлардан бу қадар кўтаринкилик кутган эмасди. Мана энди аргентиналик Хосе Пекерман шогирдларига жиддий қарашлари тайин. Зеро, улар ярим финал йўлида мезбон - Бразилия термаси билан тўқнаш келадилар. Биз эса шу онда «Родригес бандаси», дея таърифланаётган жамоанинг асосий ижрочиларига яқиндан нигоҳ ташлаймиз.

Хамес Родригес

Туғилган санаси: 12.07.1991

«Банда»даги хизматчилик вақти: 3 йил

Лавозими: бошлиқ

Лақаби: El Nuevo Pibe

Хамеснинг «банда»га қўшилганига ҳали кўп бўлгани йўқ, лекин қисқа вақтда уни ўз қўлига олди. Кўп йиллик «ота» - Фалькао кутилмаганда, четга чиққанидан кейин айнан шу ўжар ва қўпол йигит «банда» бошқарув тизимини ўзининг кучли қўллари ва толмас оёқларига олди. Аргентина, Португалия ва Франция кўчаларида «Хамес» исмини кимдир эшитиб қолишидан чўчиб, қулоққа секингина шивирлаганча айта бошлаганларига анча бўлди. Зеро, Родригес худди «Банфилд»да бўлгани каби «Порту» ва «Монако»да ҳам тезда обрў-эътибор қозонди. Боз устига, анча жиддийлашди. Родригеснинг ишни қандай олиб боришига қараб, фақат қойил қолиш керак: у ўз ҳудудини идеал тарзда кўради ва назорат қилади, ҳар қандай лаҳза ва шароитда маҳсулотни хоҳлаган нуқтага етказиб бериши мумкин. Хуллас, «банда» аъзоларининг ўз вазифаларини бажаришлари учун зарур шарт-шароит яратишга қодир «босс». Асосийси, Хамес бу ишларни шу қадар осонлик билан, силлиқ бажарадики, унинг қиёфасидан болаларча беғуборликни ҳам, катталарча жиддийликни ҳам илғаш мумкин. Қисқасини айтганда, Родригес худди машҳур ал Капоне каби ҳаттоки, душманлари доирасида ҳам ҳурматга сазовор бўлиб улгурди.

«Янги чақалоқ» («эски»си - бу Колумбия учун бетакрор «Криминал сиймо», жаҳондаги биринчи хипстер Карлос Вальдеррама) 19 ёшга тўлиб-тўлмай, уни 4 йиллик «қамоқ жазоси»га маҳкум этишди ва муддатни ўташ учун «Порту»га жўнатишди. Родригес Португалияда Халк, Фалькао, Гуарин ва Жексон Мартинес кабилар билан бирга «ўтирди». Хамес 3 йилдан сўнг шартли тарзда, вақтлироқ озодликка чиқди. Аммо тақдирнинг ҳукмига кўра, шу заҳоти Монакодаги француз колониясига тушиб қолди. У Францияда 5 йил «ўтириши» керак. Тўғри, Родригеснинг тобора ошиб бораётган обрўсини эътиборга олсак, яна қайгадир жўнатилса, ажабмас. Дейлик, Мадрид, Манчестер ёки ўхшамай қолган тақдирда Дортмунд кўчалари бор. Ҳарқалай, Бразилиядаги «разборлар»дан сўнг Хамес Родригесга янада жиддий эътибор қаратишлари муқаррар.

Хуан Куадрадо

Туғилган санаси: 25.05.1988

«Банда»даги хизматчилик вақти: 4 йил

Лавозими: бошлиқнинг ўнг қўли

Лақаби: Neco

«Банда»нинг энг «қонга ташна» вакили. Унинг луғатида моҳиятан олганда, «раҳм» ибораси йўқ. Хуан душманлари устидан кулиш, уларни турли даражада қийнашни хуш кўради. Бунда Куадрадо аввалига ақл бовар қилмас «финт»ларига урғу қаратган ҳолда, «рақс тушаётган оёқлар» шоусини кўрсатади. Агар бу томоша Хуан учун яхшилик билан тугаса, унда чинакам, тўлақонли рақсни бошлаб юбориши тайин. Яъни баданининг ҳар бир қисми рақсга қўшилади. Хуллас, ўзига хос рақслар «Родригес бандаси» бошлиғининг ўнг қўли учун аллақачон ташриф қоғозига айланиб улгурган. Куадрадонинг ўзи ҳам кейинги лаҳзада қаерга бош суқишини билмаса керак. Умуман, унинг режасини пайқаш иложсиз иш. Бордию, миясидаги фикрини ўқиб олган тақдирингизда ҳам, оёғини назорат қилолмайсиз. «Криминал дунё» анчадан буён шу қадар иқтидорли, устакор ва тутқич бермас «жиноятчи»ни кўрган эмасди.

Тўғри, Хуан гоҳида зиқналиги туфайли панд ейди. Чунки у баъзан бутун фойдани ўзлаштиришни хоҳлайди, бироқ бу борада, яъни молиявий ҳисоб-китобларда уқуви сал паст. Хуллас, Куадрадо энг ақлли, тактик билимли «жиноят»чилар қаторига кирмайди. Лекин жисмоний кўрсаткичлари ва каучуксимон эластиклик қобилияти билан бу камчилигини билдирмайди. Умуман олганда, унинг бутун районнинг «ўнг» тарафига жавоб бериши бежиз эмас. Тутқич бермаслиги туфайли Хуан ҳали қўлга тушганича йўқ. «Удинезе» ва «Фиорентина»нинг шахсий детективлик агентликлари ҳисобга кирмайди. Зеро, Куадрадо аллақачон йирик «балиқ»лар сирасига кирган ва шунга яраша катта-катта агентликлар унинг кетидан тушишган. Мисол учун, халқаро ташкилот «Фиорентина» ёрдами билан Куадрадони «Барселона», «Бавария» ёки «Реал»га жўнатмоқчи. Кўринишидан, Хуанни қўлга оладиган пайт тобора яқинлашмоқда. Шундай тақдирда, уни фақат 100 миллион гаров пули эвазига қўйиб юборишлари мумкин. Бундан камига эмас зинҳор.

Фредди Гуарин

Туғилган санаси: 30.06.1986

«Банда»даги хизматчилик вақти: 8 йил

Лавозими: маслаҳатчи

Лақаби: «Тўтиқуш»

Фреддининг бу «банда»га қўшилганига анча бўлди, ҳаттоки, Родригес ва Куадрадонинг боболари ҳам ундан чўчиб туришарди ва тўғри қилишарди ҳам. Зеро, Гуариннинг «замбараги» бутун дунёда машҳур, ундан Ер сайёрасининг ҳар қандай фуқароси қўрқади. Фредди - қони қайноқ ва эҳтиросли йигит, шунинг учун ҳам ҳар доим нишонни тўғри олмайди. Лекин нишонни мўлжалга ола билганида, ўлжасининг аҳволига ҳавас қилиб бўлмайди. «Тўтиқуш»нинг омадли юриши бутун «банда» кайфиятини кўтариб юбориши аниқ. Чунки у эффектлиликни доимо биринчи ўринга қўяди. Шунга қарамай, Гуарин «банда»да нафақат отишмалар, балки воқеаларнинг тўғри ривожланишига ҳам жавоб беради. Унинг аралашуви билан «банда» ўта қалтис «буюртмалар»дан воз кечади. Маҳаллий ҳакамлар билан жанжаллашмайди, «полиция» ғазабини қўзғатмайди. Айтайлик, Гуарин ҳар нарсани билади ва мудом Родригесга кўчанинг қайси томонидан уйга кириш маъқул эканлигини айтиб туради. «Банда»нинг қолган аъзолари эса ҳар лаҳзада айнан Гуариндан кўрсатма олиб турадилар, айтайлик, орқага қайтиш чоғи.

Ҳатто шундай доно киши ҳам жазодан қочиб қутулолмади. У 2004 йилиёқ ўта хавфли «каллакесар»ларнинг халқаро базасига киритилди. Зеро, 10 йил олдин «Криминал менежер» ўйинини сотиб олган ҳар қандай болакай Гуариннинг истиқболию, рақибларига нечоғли даҳшат солишини яхши биларди. Қисқаси, Фредди «Порту»да Родригес билан бирга «ўтирди», кейин уни Милан кўчаларида тутиб, навбатдаги «жазо»га маҳкум қилишди. Тўғри, «Интер» қамоғида у олдингидек ғайратли, жўшқин кўринмаяпти. Эҳтимол Бразилиядаги озодлик давридан сўнг яна эътиборни ўзига тортар...

Жексон Мартинес

Туғилган санаси: 03.10.1986

«Банда»даги хизматчилик вақти: 5 йил

Лавозими: киллер

Лақаби: «Аждарҳо»

Португалия колониясида тобланган яна бир «жиноятчи». Мартинес ишга тушса, яхшиси, четдан унинг ҳаракатларини кузатиб туриш маъқулроқ. Ўртага суқулиш эса ҳеч қандай яхшиликка олиб келмайди. Бир даҳшатли кунда «ота» Радамель «жиноят олами»ни тарк этишга мажбур эканлиги ҳақида ёзишганида, «Родригес банда»си таназзулга учрагандек туюлди, гўё. Ахир йўлга тўғаноқ бўладиган кимсаларни ким даф этади, ким ҳар қандай ҳолатда душманни ларзага солувчи зарбалар беради? Биргина маслаҳатчининг «замбараги» кам, яна кимдир керак, «ифлос» ишларга ихтисослашган жиддийроқ янги ижрочи. Мартинес айнан шундай йигит бўлиб чиқди. У Португалиядаги 2 йиллик фаолияти давомида 45 марта буюртмани муваффақиятли якунлади. Шунинг баробарида беҳисоб услублари билан душманлар кўнглига ғулғула солди. Мартинес ҳам ўз зиммасидаги вазифани бажаришда бутун баданини ишга солади. Энг ёқтирган усуллари - «велосипед», «товон билан зарба», «парашют». Жексон хизмат сафари баҳона Бразилияга йўл олишидан олдин халқаро қидирув эътиборига тушганди. Уни кўпчилик қуваётганини ҳисобга олсак, тез орада «қамоқ» манзилини ўзгариши эҳтимолга анча яқин.

P.S.: «Колумбия бандаси»да бошқа кўзга кўринарли «жиноятчилар» ҳам бор: Виктор «Талончи» Ибарбо, Хуан «Бузувчи», Кинтеро, «Эгизаклар» - Пабло Армеро ва Хуан Суньига, Теофилио Гутьеррес... Қисқаси, ўта жиддий «банда».

Неймарни сафдан чиқарган Суньига ФИФА томонидан жазоланиши мумкин

ADMINSTRATOR — Sun, 06 Jul 2014 03:26:44 GMT

ФИФА аҳлоқий қўмитаси, Хуан Суньига ва Неймар ўртасида содир бўлган тўқнашувни ўрганиб чиқиб, колумбиялик футболчини жазолаши мумкинлиги маълум қилинди.

Колумбиялик Хуан Суньига чорак финал ўйинида Бразилия терма жамоаси тўпурари Неймарнинг белига тиззаси билан зарба бериб, уни 4-6 ҳафтага сафдан чиқарди.

Эслатиб ўтамиз, Бразилия-Колумбия учрашувида турнир мезбонлари 2:1 ҳисобида ғалаба қозонишди. Неймар эса ўз Ватанида ўтаётган мундиални муддатидан аввал якунлашга мажбур бўлди.

Марк Вильмотс: "Аргентина ҳеч нарса кўрсата олмади"

ADMINSTRATOR — Sun, 06 Jul 2014 02:34:11 GMT

Бельгия бош мураббийи Марк Вильмотс Аргентинага қарши ўйиндан кейин ўз фикрларини билдириб ўтди.

• • •

Аргентина бизни ҳайрон қолдира олмади. Улар ҳеч нарса кўрсатала олишмади. Фақатгина ўз тажрибалари эвазига кейинги босқичга йўл олишди. Улар ўйинни фаворит сифатида бошлашди ва тезкор гол кирита олишди. Кейинчалик эса бизга ҳужумда ўйнаш имконини беришмади. Биз қўлимиздан келганини қилдик, лекин бунлдан наф чиқмади. Жаҳон чемпионати чорак финалида Аргентинага мағлуб бўлиш бу уятли натижа эмас. Бу чемпионат биз учун кўнгилдагидек ўтди дея оламан.

Манба: sports.ru

Месси: "Вазифани бажардик"

ADMINSTRATOR — Sun, 06 Jul 2014 02:33:05 GMT

Аргентина футболчиси Лионель Месси Бельгия қарши ўйиндан сўнг ўз фикрларини билдириб ўтди.

• • •

Биз ўзимизнинг илк вазифамизни бажардик. Кучли тўртликка кириш мақсадимиз амалга ошди. Янада кўпроғини истаймиз. Энди кейинги ўйин ҳақида бош қотиришимиз зарур. Бугун яхши ўйин кўрсатдик деб ўйлайман.

Манба: sports.ru