Ўтган йили кузда Александр Кержаков юбилей - 200-голини нишонлаганида, рус матбуоти Олег Веретенниковнинг рекорди баҳоргача янгиланишини тахмин қилганди. БироқРоссия терма жамоаси ва «Зенит» клуби ҳужумчиси 207та гол маррасини 9 ой ўтгачгина забт этди.

Шу баҳона «СЭ» нашри архивларни титкилаб, машҳур тўпурарларнинг эътиборли кўрсаткичлар арафасидаги натижаларига қиё боқди ва бир қаторқизиқарли далилларга дуч келди.

1000-голини 1969 йилнинг 19 ноябрида урган

999 ва 1000-голлари ўртасидаги танаффус - 2та ўйин

Футбол қироли юбилей - 1000-голини уришни уннчалик пайсалга солган эмас. Аниқроғи, у 999-голдан сўнг атиги 2та ўйинда «пауза» қилган. Шунда ҳам, яъни 2ҳафтада бутун Бразилия 1000-голни кутиб, гўёки, ақлини йўқотган. Табиийки, Пеленинг ўзи ақл бовар қилмас босим остида қолган. Аслида эса, кўпчилик 1000-гол ҳам 999-тўп киритилган ўша ўйин­даёқ қайд этилишига ишонганди. Бироқ кутилмаганда, қизиқарли ҳолат юзага келади: «Сантос» посбони майдондан четлаштирилгач, мураббийлар штаби унинг ўрнига ...Пеледан яхшироқ ўринбосар тополмайди! Хуллас, ҳужумчи юбилей голни унутиб, дарвозани қўриқлашга мажбур бўлади. Айтганча, буюк бразилиялик 1000-голини ўйин ҳолатидан эмас, балки пенальтидан урган. Аниқроғи, афсонавий «Маракана» стадионида «Васку да Гама» дарвозасини «нуқта»дан аниқ нишонга олган.

200-голини 1985 йилнинг 21 авгус­тида урган

198 ва 199-голлари ўртасидаги танаффус - 13та ўйин

Олег Блохиннинг якуний натижаси - 21 йилда 319та голга қараб, беихтиёр ўйлабқоласан: Киев «Динамо»сининг амалдаги устози рақиблар дарвозасини автомат каби ўққа тутган - тўхтамай ва танаффуссиз. Йўқ, аслида ундай эмас. Собиқ иттифоқфутболининг ажойиб тўпурари фаолиятида ҳам тўхталишлар кузатилган. Айтайлик, Блохин 28 ёшида Александр Пономарёв рекорди (152та гол)ни «йиқитгач», маҳсулдорликни анча пасайтирган. Аниқроғи, ўз сояси билан курашишига тўғри келган, гўё. 1985 йилнинг ёзида бутун мамлакат унинг юбилей - 200-голини кутаётган пайт эса, ҳужумчи нақ 3 ой (!) сукут сақлади. Боз устига, бу вақт оралиғида 2та пенальтини кўкка совурди! 199-голи август ойининг бошида, Минскда қайд этилган бўлса, яна 11 кундан сўнг афсонавий ҳужумчи «Металлист» дарвозасига белгиланган пенальтини амалга ошириб, маррага етди.

100-голини 1987 йилнинг 13 июлида урган

100 ва 101-голлари ўртасидаги танаффус - 6та ўйин

«Спартак» қироли Фёдор Черенков ҳам худди Пеле ва Блохин каби юбилей голини пенальтидан урган. Қизиғи, 100-голига фанатлар худди Бразилия Пеленинг 1000-голини кутганидек, 2 ҳафта илҳақ бўлишган. Бироқ иккинчи 100таликни очишда Фёдор кутилмаган қийинчиликларга дуч келган. Яъни навбатдаги голгача ҳужумчи нақ 6та ўйинни қуруқ ўтказган. Аниқроғи, юбилей марра ортда қолгач, Черенков 1-2та ўйинни кичик жароҳат сабаб ўтказиб юборган, унга айнан шу нарса салбий таъсир ўтказган, чоғи. Лекин эътиборлиси, ҳужумчи 101-голини халқаро ўйинда нишонлаган - УЕФА кубоги доирасида «Динамо» (Дрезден) дарвозасини ишғол этган.

1000-голини 2007 йилнинг 21 майида урган

999 ва 1000-голлари ўртасидаги танаффус - 8та ўйин

Ромарио фақатгина фаолиятининг уфқи кўрингачгина Пеле ортидан 1000та гол маррасини забт этишга киришди. Бразилиялик бунинг учун тасаввур қилиб бўлмасҳисоб-китобларга ҳам шўнғиди. Яъни ўз голларини бирма-бир санаб чиқди, ҳаттоки, ўсмирлар ва ёшлар жамоаларида урганларини ҳам умумий ҳисобга киритди. Бироқ фахрий ҳужумчи бу голлар билан ҳам ўз ҳисобини 1000га етказолмади. Ромарио «Васку да Гама» жамоаси раҳбарияти жонига шу қадар тегдики, у гўёки, таркибни иккига бўлиб, расмий ўртоқлик учрашуви уюштиришгаҳам тайёр эди - ҳужумчи 1000-голини урса ва тинчланса бўлди... Тўғри, бразилиялик юбилей голини ҳақиқий ўйинда уриш бахтига муяссар бўлди. 2007 йили «Фламенго» дарвозасини нишонга олгач, 1000-голга жуда яқинлашди ва нақ2 ойча танаффус қилди. Энг қизиғи, Ромарионинг юбилей голи ҳам пенальти самараси. Яна шуни таъкидлаш жоиз, ФИФА унинг рекордини ҳалигача тан олгани йўқ.

«А» сериясидаги 200-голини 2003 йилнинг 25 январида урган

199 ва 200-голлари ўртасидаги танаффус - 4та ўйин

Роберто Баджонинг фаолиятини ўта омадли дейиш қийин. Чунончи, мураббийлар 90-йилларнинг энг иқтидорли йигитини қолипга солишга уринишган, лекин у бунга қарши чиққан. Натижада «Сеҳрли думча» бирин-кетин гранд клублар таркибидан сургун қилинди, «Скуадра Адзурра» сафидан ҳам тушиб қолди. Тўғри, турли мушкулот ва муаммоларга қарамай, Роберто «А» сериясининг ўзида 200тадан ортиқ гол уришни уддалади. Баджо фаолиятига хотима ясаган Брешиада деярлиҳамма фахрий учун илтижо қиларди. Зеро, фанатлар суюнадиган бошқа футболчи ҳам йўқ эди. Айтайлик, «Думча» 199-голидан сўнг бироз тин олгач, бу жамоанинг натижаларида ҳам билинганди: «қалдирғочлар» кетма-кет 3та ўйинда 0:0 ҳисобини қайд этишди. Фахрий шу онда ўз голларисиз жамоаси ҳеч қаерга боролмаслигини тушунди, чоғи, бор эътиборини бир жойга йиғиб, «Парма» билан ўйинда юбилей тўпини расмийлаштирди. Яна бир ҳафтадан сўнг эса «Пьяченца» дарвозасига «муҳр» босиб, учинчи 100таликни майдалашга тушди.

Премьер-лигадаги 250-голини 2005 йилнинг 2 февралида урган

Алан Ширернинг тарихи Олег Блохиннинг 200-гол арафасидаги қийноқларига ўхшаб кетади. Зеро, инглиз ҳужумчиси премьер-лигадаги барча рақобатчиларини анча олдин ортда қолдирган ва 2000-йиллар ўрталарида фақат ўзи билан курашаётганди, яна юбилей кўрсаткичлар орзуси йўлида ҳам. Бетакрор британиялик учун уларнинг сеҳри анча кучлилик қилди. Фахрий ҳужумчи 2004-2005 йиллар мавсумини шиддат билан бошлади: 10-тургача 5та гол урган футболчини 250-маррадан 2тагина аниқ зарба ажратиб турарди. Шу вақтга келиб, Ширерда муайян муаммолар туғилди. Ахир кейинги нақ 10та тур давомида рақиблар дарвозасига йўл тополмади. Бу орада бир қатор ўта қулай ва енгил вазиятлардан фойдаланолмади. Гўёки, Алан гол уриш ҳадисини бир зумда йўқотиб қўйгандек эди. Чунончи, авваллари кўз юмиб дарвозани ишғол қиладиган вазиятларни ҳам кўкка совурди кетма-кет. Хайриятки, пенальти бор экан. 15 январь куни «Саутгемптон» билан баҳсда Ширерга ҳам айнан 11 метрли жарима зарбаси қўл келди. Голсиз серияни узган ҳужумчи яна бир турдан сўнг юбилей маррани забт этди.

Юқори даражадаги 200-голини 2008 йилнинг 30 мартида урган

199 ва 200-голлари ўртасидаги танаффус - 3та ўйин

Олег Веретенниковнинг юқори даражадаги 200-гол сари йўли машаққатларга бой бўлди. Тўғри, у маррани бўйсундирганидан атиги бир ой ўтиб, фаолиятидаги 300-голини ҳам нишонлади. Қанақасига бундай бўлиши мумкин? Ҳаммаси оддий. Гап шундаки, Олег 2000-йиллар бошида 5 мавсум қуйи лигаларда тўп сурганди.Қисқаси, Олег «Уралан», «Мордовия», СКА (Ростов) ва қадрдон клуби - «Ротор»да барқарор ҳолда гол урган, бироқ «100лик клуби»га фақат Россия кубогидаги тўплари киритилган, холос. Хуллас, Олег юқори даражадаги голлари сонини 200тадан ошириш учун Қозоғистонга йўл олишдан ўзга чора тополмади. Бироқ қозоқ диёрида ишлари унчалик силлиқ кечмади. Мавсум-2007 охирида «Иртиш» (Павлодар) сафида 2та гол урган тўпурар 199та гол маррасида тўхтади. Натижада 200-голини расмийлаштириш учун қишни ўтказиши ва «Остона» клуби сафигақўшилишига тўғри келди. Узоқ кутилган маррани эса Қозоғистон чемпионати-2008нинг 3-турида забт этди. Ўшанда 38 ёшли фахрий жарима зарбасини ўзига хос тарзда амалга оширганди.

Терма жамоадаги 68-голини 2013 йилнинг 6 сентябрида урди

63 ва 65-голлари орасида 12та ўйинда майдонга тушди

Мирослав Клозе - Германия термасининг тирик афсонаси. Бироқ йиллар барчақатори унга ҳам ўз ҳукмини ўтказяпти. Авваллари ҳар қандай турнир суперфорвард учун ўзининг тўпурарлик натижасини яхшилашга ажойиб имконият саналарди. Мана, Евро-2012 олдидан ҳам немислар ундан афсонавий Герд Мюллернинг натижаси (миллий жамоада 68та гол)ни такрорламасада, унга яқинлашишини кутишди. Бироқ 2011 йилнинг ноябридан буён бундестимда гол урмай келган Клозе қитъа чемпионатида атиги 1 марта зафар қучди - чорак финалда Греция дарвозасини ишғол қилди. Кейин эса сентябргача яна «уйқу»га кетди. Мана, Мирослав ниҳоят, яқинда Мюллер билан тенглашиб олди - 68-голини ЖЧ-2014 саралаши доирасида Австрия термасига қарши кечган баҳсда нишонлади.