Топ-клублар ўзининг кутилмаган ва ноодатий трансфер сиёсати билан доимо ажралиб туради. Энг қиммат трансферлар айнан уларнинг ижросида рўёбга чиқиши ҳам бежиз эмас. Грандлар юқори савияли, маҳорат бобида кучли саналган чарм тўп усталарини ўзига худди оҳанрабо мисол жалб қилади. 

"Аристократ”дан "қизил иблис”га айланган, улкан ғалабларни инқироз кўчасидан чиқишга уринаётган "Манчестер Юнайтед”дан излаган испан ўғлони "МЮ” тарихидаги энг қиммат футболчига айланди. Шу воқеа сабаб биз "қизил иблислар” тарихида амалга оширилган энг қиммат 10 та харидни ёдга олишга қарор қилдик.

10 ўрин. Давид Де Хеа

Аввалги клуби: "Атлетико”.
Трансфер нархи: 18,9 миллион фунт (2011 йил).

Трансфер тарихи: Манкунианликлар ўзининг узоқ йиллик тажрибали, аммо кексайиб қолган голландиялик посбони Эдвин ван дер Сарга муносиб ўринбосар излаб охири Де Хеа номзодида тўхтади. 2011 йил баҳорида испаниялик дарвозабон трансфери бўйича "Атлетико” билан келишиб олади. 

"МЮ”даги фаолияти: Де Хеа 2011 йилдан бери "қизил иблислар” таркибида 113 та ўйинда иштирок этиб, премьер-лигада зафар қучди (2012/13), икки марта Англия Суперкубогини қўлга киритди (2011, 2013).

9 ўрин. Руд ван Нистелрой

Аввалги клуби: ПСВ.
Трансфер нархи: 19 миллион фунт (2001 йил).

Трансфер тарихи: "МЮ” Голландия чемпионатининг икки карра энг яхши тўпурари ва энг яхши ўйинчиси трансфери борасида ПСВ билан 2000 йил бошидаёқ келишувга эришганди. Бироқ ван Нистелрой 6 март куни "Силькельборг”га қарши ўртоқлик учрашувида тиззасини жароҳатлаб олгани учун тиббий кўрикдан ўтолмайди. Трансфер бир йилга кечиктирилади.

"МЮ”даги фаолияти: ван Нистелрой 2001-2006 йиллар давомида "МЮ” сафида 215 та учрашувда майдонга тушиб, рақиблар дарвозасига 149 та гол уради. Премьер-Лигада ғалаба қозонади (2002/03), Англия кубоги (2003/04), Лига кубоги (2005/06) ва Англия Суперкубогини қўлга киритади. (2003).

8 ўрин. Андерсон

Аввалги клуби: "Порту”.
Трансфер нархи: 20,4 миллион фунт (2007 йил).

Трансфер тарихи: 2006/07 йилги мавсумда Андерсон португал клуби сафида Европа Чемпионлар Лигасида ўз дебютини ўтказади. Бироқ "Бенфика” билан ўйинда Константинос Кацураниснинг тўпга ташланиши оқибатида Андерсон бурнини синдириб олиб, 5 ойга сафга чиқади. Бироқ мазкур нохуш ҳолат ҳам манкунианликларни ўз қароридан қайтара олмайди. 2007 йилнинг 30 май куни "МЮ” расмий сайти клуб бразилиялик футболчи трансфери борасида келишувга эришганини эълон қилади.

"МЮ”даги фаолияти: Андерсон 2007 йилдан бери манкунианликлар сафида 179 ўйин ўтказиб, ўз ҳисобига 9 та гол ёзиб қўйди, 4 марта мамлакат чемпиони (2007/08, 2008/09, 2010/11, 2012/13), 2 марта Англия Лига кубоги (2008/09, 2009/2010), Англия Суперкубоги (2011, 2013), Чемпионлар Лигаси (2007/08) ва клублар ўртасидаги жаҳон чемпионати соҳибига айланади (2008).

7 ўрин. Робин ван Перси

Аввалги клуби: "Арсенал”.
Трансфер нархи: 24 миллион фунт (2012 йил).

Трансфер тарихи: ван Перси қадрдон жамоасини ўз елкасида кўтариб юрган бўлса-да, мақтагулик натижага эриша олмагач "Арсенал” билан янги шартнома имзолашдан бош тортади. Клуб ҳам бир йилдан сўнг жамоани эркин агент сифатида текинга тарк этадиган футболчи раъйига қарши чиқмади. Ундан кўра, нима қилиб бўлса-да, "учар голланд”ни қимматроққа сотиш ҳақида ўйлай бошлади. 

"Канонирлар” етакчисининг "МЮ”га кўчиб ўтиши Англияда ҳақиқий можарони келтириб чиқарди. "Арсенал” мухлислари Арсен Венгернинг навбатдаги бор ўз рақобатчисини кучайишига ёрдам бериб юборганини хазм қила олмай ван Перси футболкаларини ёқиб ўз норозиликларини билдиришди.

"МЮ”даги фаолияти: ван Перси 2012 йилдан бери 64 ўйинда "Юнайтед” шарафини ҳимоя қилди ва рақиблар дарвозасига 40 та гол киритди, премьер-лига (2012/13) ва Суперкубокда (2013) жамоадошлари билан ғалабани нишонлади.

Факт. Бугунги "қизил иблислар” таркибида "учар голланд” алмаштириб бўлмас ўйинчига айланиб улгурди. РВП тўп киритган учрашувларда "МЮ” камида мағлубиятга учрамаган, 80 % ҳолатларда эса ғалабани қўлга киритган.

6 ўрин. Уэйн Руни

Аввалги клуби: "Эвертон”.
Трансфер нархи: 27 миллион фунт (2004 йил).

Трансфер тарихи: Рунининг "Эвертон”даги ёрқин ўйинлари барчани Туманли Альбионда янги порлоқ юлдуз камол топаётганига ишонтирди. Шунинг учун АПЛнинг гранд клублари уни ўз таркибига қўшиб олиш учун енг шимариб ишни бошлаб юборишди. Руни учун курашда 2004 йилги ёзги транфер ойнасининг сўнгги кунларигача "Ньюкасл” ва "МЮ” етакчиликни қўлдан чиқармади. Бироқ якунда "қизил иблислар” "ҳаккалар”дан "улоқ”ни илиб кетди. 

"МЮ”даги фаолияти: 2004 йилдан буён ҳозиргача 426 ўйинда "Юнайтед” либосида майдонга тушган Руни ўз ҳисобига 208 та гол ёзиб қўйган, 5 карра мамлакат чемпиони (2006/07, 2007/08, 2008/09, 2010/11, 2012/13), 3 карра Англия Лига кубоги соҳиби (2005/06, 2008/09, 2009/10), 4 бор Суперкубок ғолиби (2007, 2010, 2011, 2013), Чемпионлар Лигаси (2007/08) ва клублар ўртасидаги жаҳон чемпионати совриндорига айланди (2008).

5 ўрин. Маруан Феллаини

Аввалги клуби: "Эвертон”.
Трансфер нархи: 27,5 миллион фунт (2013 йил).

Трансфер тарихи: Яқинда бельгиялик ярим ҳимоячи унга "Арсенал” ҳам жиддий қизиқиш билдиргани ҳақида сўз очди. Маълум бўлишича, лондонликлар Маруан учун жуда яхши таклиф тайёрлашган ва 22 миллион фунт эвазига футболчини пойтахтга олиб келмоқчи бўлишган. Бироқ Феллаини устози Дэвид Мойес ортидан "Олд Траффорд”га кўчиб ўтишга қарор қилди ва мазкур танловини "МЮ” унинг орзуси экани билан изоҳлади.

"МЮ”даги фаолияти: Феллаини жорий мавсум манкунянликлар сафида 11 та учрашувда майдонга тушди. Ҳозирча у ўзининг ёрқин ўйини ёки гол сезиш қобилияти билан мухлисларни хурсанд қилолмади, бироқ янги клуби билан Англия Суперкубогини (2012) қўлга киритгани футболчининг ўзи учун энг юқори натижа бўлиб турибди. 

4 ўрин. Хуан Себастьян Верон

Аввалги клуби: "Лацио”.
Трансфер нархи: 28 миллион фунт (2001 йил).

Трансфер тарихи: 2001 йил ёзида "Лацио” бирваракайига ўзининг икки етакчиси – Недвед ва Веронни бошқа клубларга сотиб юборди. Сэр Алекс Фергюсон анча вақтдан бери римликлар плеймейкери ўйинларини диққат билан кузатиб борарди ва уни "МЮ” ярим ҳимояси учун муносиб номзод деб билди. 

"МЮ”даги фаолияти: 2001 йилдан 2003 йилгача Верон "Юнайтед” сафида 77 та ўйин ўтказиб, рақиблар дарвозини 11 бор ишғол қилди, клуби билан премьер-лигада шоҳсупадан жой олди (2002/03).

3 ўрин. Рио Фердинанд

Аввалги клуби: "Лидс”.
Трансфер нархи: 29,3 миллион фунт (2002 йил). 

Трансфер тарихи: "МЮ” 2002 йили 24 ёшли ҳимоячи учун "Лидс” ҳисоб рақамига 30 миллион фунт ўтказиб берди. Бу шубҳасиз ҳимоя чизиғидаги ўйинчилар учун рекорд даражадаги маблағ ҳисобланади.

"МЮ”даги фаолияти: 2002 йилдан "қизил иблислар” мудофаасида жавлон уриб тўп сураётган Фердинанд ҳозиргача 440 та учрашув ўтказиб, 8 бор рақиб дарвозасига тўп йўллади, 6 марта премьер-лига (2002/03, 2006/07, 2007/08, 2008/09, 2010/11, 2012/13), 3 карра Англия лига кубоги (2005/06, 2008/09, 2009/10), 5 марта Суперкубок (2003 2007, 2008, 2011, 2013), Чемпионлар Лигаси (2007/08) ва клублар ўртасидаги жаҳон чемпионати совриндорига айланди (2008).

2 ўрин. Димитар Бербатов

Аввалги клуби: "Тоттенхэм”.
Трансфер нархи: 30,75 миллион фунт (2008 йил).

Трансфер тарихи: Бербатовнинг "Олд Траффорд”га кўчиб ўтиши ҳақидаги миш-мишлар бутун ёз давомида тинмади. Бироқ мазкур харид фақатгина трансфер дарчаси ёпилишига саноқли соатлар қолганидагина расмийлаштирилди. 

"МЮ”даги фаолияти: Болгариялик ҳужумчи 2008-2012 йиллар давомида 149 та учрашувда майдонга тушиб, ўз ҳисобига 56 та гол ёзиб қўйди, икки мартадан Премьер-лига (2008/09, 2010/11), Англия Лига Кубоги (2008/09, 2009/10), Суперкубоги (2010, 2011) ва бир бор клублар ўртасидаги жаҳон чемпионати ғолиби бўлди. (2008).

1 ўрин. Хуан Мата

Аввалги клуби: "Челси”.
Трансфер нархи: 37,1 миллион фунт (2014 йил).

Трансфер тарихи: Матанинг "Челси”ни тарк этиши ҳақидаги дастлабки миш-мишлар 2013 йил ёзи сўнггида тарқалди. Ўшанда "кўклар” бошқарувини яна ўз қўлига олган португалиялик мутахассис Жозе Моуриньо матбуотда испаниялик хавбек унинг режаларига кирмаслигига шаъма қилганди. 

Январнинг иккинчи ярмидан бошлаб эса британиянинг бир қатор нуфузли нашрлари Мата тез орада Лондонда Манчестерга кўчиб ўтиши ҳақида бонг ура бошлади. Клублар шошилишди, бироқ харидни якшанбагача расмийлаштиришга улгуришди. 

Манба: www.fapl.uz