*** FIFA расмий сайтида ўтказилган сўров орқали ЖЧ тарихидаги энг чиройли гол аниқланган. У буюк Диего Марадона томонидан ЖЧ-86 чорак финалида Англия терма жамоаси дарвозасига 54-дақиқада урилган.

«Аср голи» аргентиналикнинг қойилмақом юриши маҳсули эди. Тўпни қабул қилиб олган Диего рақиб жарима майдони томон катта тезликда ҳаракатланиб, йўл-йўлакай 6 нафар инглизни алдаб ўтади (жумладан, дарвозабонни ҳам). Қизиғи, шундан атиги 3 дақиқа олдин Марадона «Илоҳий қўл» номини олган ўша машҳур голини нишонлаганди.

*** Голни чақалоққа бағишлаш саҳнаси - қўлни тебратишни бразилия­лик Бебето кашф қилган.

*** «Индепендьенте» (Аргентина) клубининг ҳужумчиси Мальони энг тезкор «хет-трик» муаллифи ҳисобланади. У 1973 йилнинг 18 март куни «Химнасия ва Эстрима» дарвозасини 1 дақиқаю 50 сония ичида 3 марта нишонга олган.

*** Англия премьер-лигаси тарихидаги энг тезкор «хет-трик» Робби Фаулерга тегишли. «Ливерпуль» ҳужумчисига мавсум-1994/1995да «Арсенал» дарвозаси тўрини 3 марта силкитиш учун 4 дақиқаю 32 сония кифоя қилган.

*** Ватикан термаси ўз тарихида бир мартагина халқаро ўйин ўтказган - Монако жамоаси билан. Ўша ўйинда ҳисоб очилмаган.

*** 70-йилларда Мексика клублари ўртасидаги учрашувда «ҳотамтой» ҳакам Гонсалес нақ 26 марта қизил карточка кўрсатган. Боз устига, кетма-кет (узлуксиз) тарзда. Гап шундаки, футболчилардан бири майдондан четлатилгач, икки жамоа вакиллари ўртасида муштлашув юзага келган. Гонсалес эса уни тўхтатолмай,ҳаммани бир четдан «қизил» билан «сийлаб» чиққан. Жумладан, майдонга югуриб тушган мураббийлар ҳам бенасиб қолишмаган.