Африка футболи – ўзига хос “ширинлик”. "Қора" қитъа вакиллари ҳеч қачон икир-чикиригача ўйланган, ё прагматик эмас, балки доим эҳтиросларга тўла, ҳаяжонли ўйин кўрсатишлари билан ном қозонганлар. Уларнинг тезлиги жаҳон футболидаги энг юқори кўрсаткичлардан бири. 

 

Ганаликлар тарихда кучли тўртликка чиқа олган Африканинг дастлабки жамоаси бўлиши мумкин эди, аммо аввалдан уларнинг ютишига кўпчилик ишонмасди. Ўйин худди болалар арғимчоғини эслатарди. Ганалик футболчилар ҳимояда 90 дақиқа бардош бериб, сўнг қўшимча вақтда яна ярим соат, унинг тугашига яқин эса бутун Африканинг орзасини рўёбга чиқаришларига бир одим қолди. 

 

 

Аммо... Ошириб берилган бурчак тўпидан кейин, тўп Уругвай жарима майдони ичида “типирчилаб қолди” – зарба, яна битта, Муслера ҳеч нима қилолмайди! Суарес тўпни дарвоза чизиғидан тиззаси билан чиқариб юборади, бироқ ганалик футболчи яна тўп тепди. Яна Суарес уни қайтарди, ҳакамнинг ҳуштаги… Қизил карточка ва сўнгги умид фоли учун пенальти! Жанубий америкаликларнинг энг кучли футболчиси ўзини тута олмай, дарвозага кириб келаётган тўпни қўли билан қайтарди. Суарес кўз ёшларини тўхтата олмас, бошини футболка ичига тиқиб олганича майдондан чиқиб борарди. У жамоасини муқаррар мағлубиятдан қутқарди –Уругвайда жавоб голи уришга вақт ҳам қолмаган эди. Луис кийиниш хонасига кетмай, майдон чеккасида қолди ва бир неча сониядан сўнг жамоадошлари билан бирга хурсандлигидан сакрай бошлади – турнирда барча пенальтиларни бехато амалга оширган Асaмоа зарбасидан кейин тўп тўсинга тегди.

 

 

Ганаликларнинг пенальти белгиланган пайтдаги чексиз қувончи ўрнини умидсизлик ва афсус-надомат эгаллади. Хаёлан чемпионатни тарк этиб улгурган уругвайликлар эса, ўйинда қолдилар. Фортуна бу кеча тўла-тўкис жанубий америкаликлар тарафида бўлдики, уларга пенальтилар сериясида ҳам ғалабани тақдим этди. Ганаликлар беҳол ва ҳиссиз яшил майса устига қулаб, вувузелаларнинг тўхтовсиз шовқини тагида “чўкиб кетдилар”.