Нигерия терма жамоаси Африканинг энг кучли жамоаларидан бири саналади. Бу терма жамоани "африка бразилияси" деб аташади. Дарҳақиқат, Нигерия ҳар доим кучли футболчиларга эга бўлиб келган. Бу терма жамоадан сафидан Жаҳон даражасидаги футболчилар етишиб чиқишган. Нигерия ўзининг мундиалдаги илк иштирокини 1994 йилда АҚШда ўтказилган Жаҳон чемпионатидан бошлаган. Шундан кейин Нигерия деярли мундиалнинг доимий қатнишчиларидан бири десак муболаға бўлмайди. Фақатгина 2006 йилда Германия бўлиб ўтган чемпионатда улар қатнаша олишмаган. Нигерия ўзининг дебют чемпионатидаёқ 1/8 финал босқичига қадар етиб боришган. Кейинги 1998 йилги чемпионатда ҳам улар айнан шу натижани такрорлашни уддасидан чиқишган эди. 2002  ва 2010 йилги Жаҳон чемпионатида Нигерия ўз иштирокини гуруҳ босқичида тўхтатишига тўғри келган. 

Африка Кубоги мусобақаларида ушбу юрт вакиллари уч бор чемпионликни расмийлаштиришган. Илк бор улар 1980 йилда Африкада тенгсиз бўлишган. Орадан 14 йил ўтиб, 1994 йилда Нигерия яна Африканинг энг кучли жамоаси номига сазовор бўлган. Кейинчалик улар доимий тарзда ярим финал босқичигача етиб келишган ва ҳал қилувчи баҳсларна нуқул омадлари чопмаган. Нигерия Африка кубогида бронза ва кумуш меддаларига ҳам кўп бор эгалик қилган. Ниҳоят 19 йиллик танаффусдан сўнг, Нигерия 2013 йилда бўлиб ўтган Африка кубогида ғалабани тантана қилди. 
Нигерияда ҳозир янги авлод вакиллари терма жамоа бўлагини ташкил этишмоқда. Жамоа таркиби анча ёшартирилган. Нигерия таркиби асосан легионерлардан иборат.

Нигерия ушбу мундиалда гуруҳдан чиқиш вазифасини ўз олдига қўйган. Бу борада уларга энг катта рақобатчи бу Босния ва Герцеговина терма жамоаси бўлади. Аргентина гуруҳ фаворити саналса, Босния ва Нигерия иккинчи йўлланма учун курашишади. Эрон терма жамоаси таркиб ва маҳорат жиҳатдан гуруҳдаги сўнгги жамоа ҳисобланади. 

Нигерия футболида ёрқин из қолдирган футболчилар ҳақида гапирадиган бўлсак, унда Якубу Айегбени, Амокачи, Агахова, Бабангида, Селестин Бабаяро, Финиди Жорж, Виктор Икпеба, Нванко Кану, Обафеми Мартинс, Питер Одемвинги, Окоронкво, Жей-жей Окоча сингари чарм тўп усталарини мисол келтириш мумкин. Айнан шу футболчилар Нигерия терма жамоасини Жаҳонда танилишида ўзларининг жуда катта ҳиссаларини қўшишган. 

Нигерия терма жамоаси ҳақида:

Ташкил топган йил: 1949

Бош мураббий: Стивен Кеши

Жамоа сардори: Дон Оби Микель 

Энг кўп ўйин ўтказган футболчи: Жозеф Йобо (95)

Энг яхши тўпурар: Рашиди Йекини (37)

ФИФА рейтингидаги ўрни: 35

Илк ўйин: Нигерия - Сьерра Льеоне 2:0 (1949 йил)

Энг йирик ғалабаси: Нигерия - Дагомея 10:1 (1959 йил) 

Энг йирик мағлубияти: Олтин Дарё - Нигерия 7:0 (1955 йил)

Эришган ютуқлари: 
Африка кубоги соҳиби: (1980, 1994, 2013)


Нигерия терма жамоаси таркиби:

Дарвозабонлар: Эньяма ("Лилль"), Эджиде ("Хапоэль" БШ), Агбим ("Гомбе Юнайтед").
 
Ҳимоячилар: Йобо ("Норвич"), Эчиеджиле ("Монако"), Ошанива ("Ашдод"), Обоабона ("Ризеспор"), Эгвуэкве ("Варри Вулвз"), Омеруо ("Челси"), Эмброуз ("Селтик"), Одунлами ("Саншайн Старз").
 
Ярим ҳимоячилар: Оби Микел ("Челси"), Онази ("Лацио"), Азиз ("Альмерия"), Учебо ("Серкль Брюгге"), Габриэль ("Ваасланд-Беверен").
 
Ҳужумчилар: Одемвинге ("Сток Сити"), Муса (ЦСКА), Амеоби ("Ньюкасл"), Эменике ("Фенербахче"), Бабантуде ("Волинь"), Мосес ("Ливерпуль"), Нвофор ("Херенвен").