Нега энди ўлим гуруҳи? – дейишингиз мумкин. Бу квартет, айнан, бугунги мақола қаҳрамонлари Коста- Рика учунгина эмас, балки, тўртликдаги Уругвай, Англия, Италия учун ҳам жуда қийин гуруҳ. Нима ҳам дердик, бу гуруҳда ўйинлар якунига етгач, 1\8 финалда – Суарес, Руни, Пирло каби юлдузлардан бирини кўрмаслигимиз аён бўлади. 

Коста-Рика мухлислари эса, ўз суюклиларини мундиалда муваффақиятли ўйин кўрсатишларига ишонмоқдалар. Ишонч – ажойиб туйғу. Майли, уларнинг катта умидларига шубҳа қилмайлик. Ахир бу – футбол. Майдонга рақибинг номдор бўлишидан қатъий назар, ҳар доим ғалаба қозониш орзуси билан тушиш спортнинг асосий ғоясидир. 

КОНКАКАФлик терманинг қандай лақаб эгаси эканлигини тушуниш қийин. Чунки, Los Ticos испанчадан “шина”-деб таржима қилинади. Лақабнинг мана шу жойи муаммо, чунки, Шимолий Америка термасининг автомобил ғилдирагига қандай алоқаси бор эканлиги бизга қоронғу. Лекин, мана бу жиҳат яъни, «tico» сўзлашув нутқида costariccences маъносини билдиришини ҳисобга олсак, уларнинг лақаби оддийгина “коста рикаликлар” бўлиб чиқади. 

 

“Костарикаликлар”нинг мухлислари эса, алоҳида мавзу. 2013- йилнинг 16- октябрь куни Коста-Рика пойтахти Сан-Хосе кўчаларида ҳақиқий улкан тобут изғиб юрди. Унинг қопқоғи қизил-оқ ва кўк рангларга бўялган бўлиб, тобут ичида Мексика байроғига ўралган суяклар ётарди. Ишқибозлар ўз термалари рақибинин келажакда қандай ҳолат кутаётганини мана шундай ифода этгандилар. Ишонинг, агар Бразилияда жаҳон чемпионати билан бир вақтда футболдаги рақибларни қўрқитиш бўйича фестиваль ҳам ўтказилганида барча бош ҳакамлар костарикаликлардан сайланган бўлар эди. Эҳ-ҳе, улар АҚШ термаси ўйинини издан чиқариш учун нималарни ўйлаб топишмади. Қисқаси, бу терма фавқулодда “ижодкор” мухлисларга эга. 

 

Хорхе Луис Пинто бошчилигидаги жамоанинг бошқалардан ажралиб турадиган жиҳати ҳам йўқ. Унчалик таниқли бўлмаган футболчилар жамланмаси. Доим ғалаба учун майдонда бор кучи билан ўйнайдиган жамоа. Оддийгина, камтар ўз вақтида кўплаб ютуқларни қўлга киритган ўз қитъасининг номдор термаси. 
Таркиб ҳақида кўп гапиришни кераги йўқ, менимча. Ўтмишдаги Ванчопедан сўнг бу юртдан жаҳон юлдузи даражасидаги бирор ўйинчи чиқмади, шекилли. Лекин, насиб қилса мана шу мундиалда сиз ўзингиз учун костарикалик бир нечта ажойиб футболчиларни кашф этасиз. 

Пинто жамоаси таркиби: 

Дарвозабонлар - Кейлор Навас ("Леванте", Испания), Патрик Пембертон ("Алахуэленсе"), Даниэль Камбронеро ("Эредиано"). 

Ҳимоячилар - Джонни Акоста ("Алахуэленсе"), Жанкарло Гонсалес, Вэйлон Фрэнсис ("Коламбус", США), Хайнер Мора, Майкл Умана ("Саприсса"), Хуниор Диас ("Майнц", Германия), Кристиан Гамбоа ("Русенборг", Норвегия), Рой Миллер ("Нью-Йорк Ред Буллз", США), Оскар Дуарте ("Брюгге", Бельгия). 

Ярим ҳимоячилар - Сельсо Борхес (АИК, Швеция), Кристиан Боланьос ("Копенгаген", Дания), Оскар Эстебан Гранадос, Хосе Мигель Куберо ( "Эредиано"), Майкл Баррантес ("Олесунн", Норвегия), Ельцин ("Саприсса"), Диего Кальво ("Волеренга", Норвегия). 

Ҳужумчилар - Брайан Руис (ПСВ, Нидерланды), Жоэль Кэмпбелл ("Олимпиакос", Греция), Рэндалл Бренес ("Картагинес"), Маркоc Уренья ("Кубань", Россия). 
Ельцин фамилиясини кўриб, ҳайрон бўлманг, бу ўйинчини Россиянинг собиқ президентига умуман алоқаси йўқ. Бундан ташқари бу ўйинчининг фамилияси эмас, исми унинг фамилияси Тахедо. 

ХОЭЛЬ КЭМПБЕЛЛ – бу ўша - 100 қути “Панини” наклейкаларини сотиб олиб ундан ўз суратини тополмай хафа бўлган футболчи. Ўсмирлигида катта умид уйғотиб, оқламаган лекин, вақти-вақти билан чиройли ўйинлар намойиш этадиган Хоэль фаолияти давомида “Арсенал”, “Лорьян”, “Бетис” жамоаларида тўп сурган. Ҳозир у “Олимпиакос” ўйинчиси. Мундиал ҳужумчи учун ўзини кўрсатишга зўр имконият. 

ХОРХЕ ЛУИС ПИНТО – Бразилияга турли термалар бошчилигида борадиган учта колумбиялик мураббийлардан бири. Ўйинни ташкил қилишга жуда уста. Унинг оқилона тактикаси эвазига терма жамоа ўз қитъасидан мундиал сари йўл олди. Саралашнинг охирги ҳал қилувчи раундида беш ҳимоячи билан ўйнаган терма жуда кам гол ўтказди. Хорхе доим Жозе Моуриньога ўхшашга ҳаракат қилади. Турли тактик схемалар, футболни фан сифатида ўрганиши излануванчилиги мақтовга сазовор. 

 

Тахминларга келсак, агар бу жамоани гуруҳдан чиқа олади, десак муболаға бўлса керак. Яна сирли футбол олами бизга қандай совғалар тайёрлагани фақат Яратганга аён. Чунки, умид учқунлари мундиалда қатнашиши ҳуқуқини қўлга киритган барча жамоаларда бор. Кутамиз ва умид қиламиз. 

Коста- Рика термаси бош мураббийи Хорхе Луис Пинтодан иқтибос: 
“Сиз мени ўз тактик схемасида қайсарларча иш тутадиган мураббий деб ўйлайсиз. Лекин, бутун мамлакат ва мундиалга йўл олган 32 жамоа мураббийлари менга қойил қоляпти. Шундай экан, ниманидир ўзгартиришимга ҳожат йўқ деб ўйлайман ” 

Коста- Рика термасининг гуруҳ баҳсларидаги ўйинлар жадвали: 

14 июнь Форталеза Уругвай - Коста- Рика 
20 июнь Ресифи Италия - Коста- Рика 
24 мюнь Белу- Оризонти Коста- Рика - Англия