«Анжи»даги барча можароларнинг асосий айбдори Игорь Денисов дейиш ноўрин. Баррикаданинг бошқа томонида Самуэль Это`О борлигини унутмаслик лозим. Ахир камерунлик футболчи ҳам «фаришта» эмас.

У олдинлари ҳам можароли ишларга кўп аралашиб қолган. Sport.ru сайти Самуэль фаолиятидаги эсдақоларли бешта жанжални ёдга олди.

Самуэль Это`О «Капи» Месасга қарши

Камерунлик футболчининг дастлабки профессионал клуби «Леганес» бўлганини кўпчилик яхши эсламаса керак. Камтарона «Леганес»да бир пайтлар Испания примеросида тўпурар футболчилардан ҳисобланган Энрике Катанья ҳам фаолият олиб борган. Жамоа асосан бир ҳужумчи тактикасига суянарди. Шубҳасиз, 17 ёшли Самуэлнинг кўпроқ захирада ўтиришига тўғри келарди. У аксари ҳолларда ўйин якунланишига 15-20 дақиқа қолганида майдонга тушириларди. Бу эса ўз олдига катта мақсадларни қўйган йигитчага маъқул келмасди.

«Леганес» сардори Месас билан алоқалари бошиданоқ яхши эмасди. Майдонда бор кучини ишга солиб ҳаракат қиладиган «Капи»га йигитчанинг қилиқлари ёқмасди. Сафар ўйинларидан бири бошланишига ўн дақиқа қолганида «портлаш» юз берди. Это`О жамоани ҳозироқ тарк этиб, Мадридга қайтаман дейди. Месас кўп ўйлаб ўтирмади ва Сэммини ёқасидан ушлаб, «Сен нимани ўйладинг, ифлос,ҳаммасини шундай ташлаб кетаверасанми?» дейди.

Бу воқеа нима билан тугади? Ўша пайтдаги тажрибасиз йигитча Это`О ва Месаслар қалин дўстга айланишди. Нафақат дўстлар, балки «Капи» ҳозир ҳам камерунлик спортчининг Испаниядаги вакили ҳамдир.

Самуэль Это`О «Реал» (Мадрид)га қарши

«Madrid cabron saluda al campeon» - бу гапларни Сэмми «Эль Классико»нинг Мадрид томони учун айтганди. Ўшанда камерунликни унчалик катта бўлмаган жаримага тортишганди. Шундан сўнг Это`О учун «Сантьяго Бернабеу» эшиклари ёпилди.

Асли очиқмиди? Бир тарафдан, айнан мадридлик скаутлар 15 ёшли йигитчанинг Камерун ўсмирлар терма жамоасидаги ўйинини кўриб қолишган. Бонус сифатида «Реал» ўзининг олимпия чемпионига эга бўлган. Сэмми 2000 йили Сиднейда бўлиб ўтган Олимпиадага айнан «Реал» ўйинчиси сифатида йўл олганди. Ўшанда «бўйсунмас шерлар» олтин медалларни қўлга киритишган. Бошқа тарафдан эса «Қироллик клуби»нинг бирорта мураббийи йигитчага имкон бериш ҳақида ўйламаган. Яъни, Голливуд блокбастерларидаги каби бош қаҳрамон қоронғи томонга ўтиб қолган. Шундан бўлса керак, футболчи ҳозир ҳам «Реал»ни ёмон кўради.

Камерун терма жамоасининг тўпурари бўлиб турган Сэм «бўйсўнмас шерлар» сафидаги дастлабки учрашувини 1996 йили ўтказган. КФФ раҳбарларининг очкўзликлари қачондир бундай можаронинг келиб чиқишига сабаб бўларди. Бу ташкилот юлдузлардан қандай фойдаланишни яхши билади. Чунки уларни Тайван, Фижи ва ҳаттоки, Ливерпуль паблари терма жамоаси каби рақиблар билан бўлган ўйинларга ҳам таклиф қилишаверган. Чунки Это`О ва Европа клубларида тўп сураётган футболчиларсиз Камерун терма жамоасининг ўйинига унчалик кўп мухлис кирмасди. Шунга қарамай, етакчилар терма жамоада қуруқ «раҳмат» учун ўйнардилар. Бир кун келиб ҳаммаси Самуэлнинг жонига тегди ва у жанжал кўтаришга қарор қилди. Оқибатда уни ўйинлардан четлатишди, сардорлик боғичидан маҳрум қилдилар ва дисквалификация қилишди. Ўзининг айтишича, ўлдирмоқчи ҳам бўлишган. «КФФ вакилларининг одамлари мени ўлдиришмоқчи. Ҳозир тансоқчилар билан яшаяпман. Улардан бири ётоғим ёнида тунайди. Ҳатто, терма жамоадошларим билан ҳам овқатланмаяпман. Чунки мени заҳарлашларидан қўрқаман»,-деганди футболчи. Бу жараён эса ҳали тугагани йўқ.

Самуэль Это`О Алекс Сонгга  қарши

Сир эмас, Камерун терма жамоасининг айрим футболчиларига Самуэлнинг термадаги ваколати ёқмайди. Масалан Это`Онинг яқин дўсти Ригобер Сонгнинг жияни Алекс буни хушламайди. Айни пайтда «Барса» шарафини ҳимоя қилаётган футболчи кўпдан буён етакчиликни ўз қўлига олиб, сардорлик боғичини тақишни истайди. Икки футболчининг орасига аллақчон совуқлик тушиб бўлган. Сенегал билан бўлган учрашувда бир-бирлари билан саломлашмаганликлари айсбергнинг чўққиси, холос.

Бир журналист Сэммидан гап нималигини сўраганида, «Иккита юлдуз ўртасидаҳеч қандай келишмовчилик йўқ. Ахир мен жаҳоннинг энг яхши ўйинчиларидан бириман. Сонг эса ҳаттоки, Камеруннинг энг яхши футболчилари қаторига ҳам кирмайди»,-деганди. Кўриниб турибдики, Это`О учун Алекс ҳеч ким эмас.

Юрий Красножан билан бўлган воқеани ҳеч ким эсдан чиқармаган бўлса керак. У «Анжи»ни қабул қилиб олганида кунига икки маҳалдан машғулот олиб борарди. Бунга эса инжиқ юлдуз қаршилик қилган. Сулаймон Керимов эса иккита ёмон вазиятдан битта яхшисини танлашга одатланган. Шу боис ҳам эндигина иш бошлаган мураббий истеъфога чиқарилган.

Игорь Денисовнинг айтишича, Махач-қалъадан Гус Хиддинкнинг кетишига ҳам камерунлик футболчи сабабчи экан. Кўриниб турибдики, ҳар қандай вазиятда ҳам клуб хўжайини Это`Онинг ёнини олмоқда. Воқеалар ривожи қандай тус оларкин?

InterFutbol gazetasidan