2,208: Андрес Иньеста томонидан ўтган мундиалнинг ҳал қилувчи ўйинининг қўшимча вақтида киритилган тўп жаҳон чемпионатлари финал босқичлари тарихидаги 2208-гол бўлиб қолди. 

 

 

0: 1930 йили бўлиб ўтган биринчи жаҳон чемпионатининг энг яхши тўпурари аргентиналик Гильермо Стабиле турнирга қадар миллий жамоаси учун биронта ҳам учрашувда майдонга тушмаган ва дастлабки имкониятига асосий ҳужумчи Роберто Черро касал бўлиб қолганидан кейин эга бўлган. 

 

4: Турнир тарихи давомида фақат тўрт учрашувда ҳар икки жамоанинг ҳам сардорлари тўп урганлар. 

 

9: 1954 йили ўйинчи рақамлари жорий этилганидан сўнг жаҳон чемпионатларида тўрт маротаба “тўққизинчи” рақам соҳиблари энг яхши тўпурар бўлган: Дражан Еркович (Югославия) 1962 йили, Олег Саленко (Россия) 1994 йили, Давор Шукер (Хорватия) 1998 йили ва Роналдо (Бразилия) 2002 йили. 

 

517: 1990 йилги Италияда бўлиб ўтган жаҳон чемпионатида майдон эгалари дарвозабони Вальтер Дзенга ўз дарвозаси даҳлсизлигини 517 дақиқа давомида сақлаб турган. 

 

3: 2006 йили Австралияга қарши учрашувда хорватлар ҳимоячиси Йосип Шимуничга уч марта сариқ карточка кўрсатилган, чунки арбитр Грэм Пол адашиб бир огоҳлантиришни Хорватиянинг эмас, балки Австралиянинг учинчи рақамига (Крейг Мур) ёзиб қўйган экан. 

 

11: Луис Фелипе Сколарига жаҳон чемпионатларининг финал босқичларида қаторасига 11 та ғалабадан иборат бўлган рекорд тегишли: 2002 йили Бразилия термаси унинг қўл остида барча етти ўйинда ғалаба қозониб, жаҳон чемпиони бўлди, тўрт йилдан кейин у бошқарган португалияликлар кетма-кет тўртта ютуққа эришдилар. 

 

300: Ўйинга келган томошабинлар сони камлиги бўйича “рекорд” 1930 йилги дастлабки жаҳон чемпионатида қайд этилган бўлиб, унда Румыния – Перу матчига (3:1) бор-йўғи 300 киши ташриф буюрган. 

 

16: Бир мундиалда бирорта ҳам жамоа Жанубий Корея терма жамоаси 1954 йили ўтказиб юборганидан кўпроқ тўп қўйиб юбормаган. Ўшанда Узоқ Шарқлик футболчилар венгрларга (0:9) ва туркларга (0:7) йирик ҳисоб билан ютқизишган. 

 

4: ГФР (Германия) термаси жаҳон чемпионатларининг плей-офф ўйинларини тўрт марта ўйиндан кейинги пенальтига олиб борганлар ва уларнинг барчасидан ғолиб чиққанлар. 

 

14: Англиялик ҳакам Ховард Уэбб тўрт йил илгари жаҳон чемпионатлари финалларининг рекордини ўрнатди: у бу учрашувда испанлар ва голландларга жами 14 та сариқ карточка кўрсатди. Уэбб бу билан чекланмай, яна бир футболчини майдондан ҳайдаган. 

 

20: Турнирдаги умумий “рекорд” эса россиялик арбитр Валентин Ивановга тегишли бўлиб, у 2006 йили 1/8 финалнинг Португалия – Голландия ўйинида ўйинчиларни 16 та огоҳлантириш билан “тақдирлаб”, яна тўрттасини майдондан ҳайдаган. 

 

 

7: Бразилия ва Швеция жаҳон чемпионатларининг финал босқичларида ўзаро етти маротаба учрашганлар: 1938, 1950, 1958 (финал), 1978, 1990 ва 1994 (икки марта) йилларда. Пентакампеонлар ҳисобида беш ғалаба ва икки дуранг бор. 

 

14: Жаҳон чемпионатининг бирорта бўлғуси ғолиби ҳам 1954 йили ГФР терма жамоаси ўз дарвозасидан ўтказиб юборганидан кўп тўп қўйиб юбормаган. Ўшанда немислар ўз дарвозаларидан ўн тўртта тўп олиб чиқиб, ундан саккизтасини гуруҳ босқичи ўйинида Венгрия термаси киритган эди. Финалда немислар афсонавий «олтин жамоа»дан реванш олишга эришдилар – 3:2.