Россиянинг Sports.ru сайти Мундиал гуруҳ босқичида ажойиб ўйинлар ўтказган етти энг яхши терма жамоа ҳақида қисқа мақола тайёрлаган. У билан сизни ҳам таништириб ўтмоқчимиз.

7. Мексика

Ажойиб мураббий Мигенл Эррера қўл остидаги қувноқ терма жамоа плей-оффга Лука Модрич ва Хорватияни ўтказиб юбормади ва Бразилия терма жамоаси ҳужумини тўхтатиб қолишни уддалади.  1/8 финалда Мексика ўта кучли ўйин намойиш қилаётган Голландия билан рўбарў келади, лекин Шимолий Америка материги мамлакатининг голкиперининг ажойиб формада экани ва ўта хавфли зарбаларни ҳам баратраф қилаётганини ёдимиздан чиқармаслигимиз керак.

6. Германия
Германия термасининг ҳужум чизиғи Марко Ройссиз ҳам ўзини ажойиб ҳис этмоқда, Томас Мюллер Бразилиядаги мундиалнинг ўзида Роналдони ҳам Клозени ҳам ортда қолдиришни мўлжллаяпти. Муҳим учрашувда Матс Хуммельс олган жароҳат эса жиддий бўлиб чиқмади. Германия терма жамоаси бу йилги чемпионатда фақат ғалаба учун ўйнамоқда. Гуруҳ босқичининг уччала ўйинида ҳам бу яққол сезилиб турди.

5. Франция
Дидье Дешам мундиалга Самир Насрини олиб келмади, Франк Риберини эса жароҳат сабаб йўқотди, бироқ бу Франция терма жамоасига Гондурас ҳамда Швейцария устидан йирик ғалабаларга эришишда ҳалақит қилгани йўқ. Натижада гуруҳдаги учинчи учрашув шунчаки расмиятчиликка айланди. Футболчиларни формада ва яхши кайфиятда ушлаб туриш учун  Дешам ғалабадан кейин ҳам тарикбда ротацияларни амалга ошириб келаяпти. Плей-оффда биз гуруҳ босқичида турли услубларни синаб кўрган Францияни кўрамиз, яна бир ажойиб жиҳат шундаки жамоа аввалги мусобақаларда бўлган “кийиниш хонасидаги жанжаллар” тавқи-лаънатидан қутулган кўринади.

4. Коста-Рика

Жаҳон чемпионатининг чинакам сенсациясига Коста-Рика терма жамоаси айланди, Англия, Италия ва Уругвай каби терма жамоалар ўрин олган гуруҳдан биринчи ўрин билан чиққан ушбу жамоа плей-оффда ҳам деярли фаворит бўлиб турибди. 1/8 финалда жамоа етакчиси Хоэль Кэмпбелл ва унинг дўстлари грекларга қарши ўйнашади. Эслатиб ўтамиз, коста рикаликлар ҳали бирор марта ҳам мундиал плей-офф босқичига чиқа олишмаганди, шу сабабли ҳам эртак ҳали давом этса керак.

3. Чили
Лотин Америкасининг энг эпчил жамоаси қийин гуруҳдан қийинчиликларсиз чиқишни уддалади ва қизиғи буни ҳали юз фоиз тикланиб улгурмаган Артуро Видаль билан қилди. Жамоа устози Хорхе Сампаоли Марсело Бьелса ғояларини мукаммал тарзда тадбиқ эта олди, Луис Фелипе Сколари ҳам бугунги учрашув олдидан рақибнинг прессинги ва Чилининг тезкор пасларидан чўчиб турганини тан олди.

2. Колумбия

Фалькао? Яна қанақа Фалькао? Колумбия плей-оффга “Монако”нинг тўпурар юлдузи, марказий ҳужумчисисиз ҳам чиқишни уддалади. Фалькаонинг клубдаги жамоадоши Хамес Родригес нима учун ўзини сайёрамизнинг энг тезкор ва кучли ҳужумкор футболчиларидан бири деб эътироф қилишаётганини барчага тушунтириб бера олди, 38 ёшли Марио Йепес эса ҳимоядаги вазиятни ортиқча қийинчиликларсиз назорати остига олган. Хосе Пекерман қўл остидаги жамоанинг ЖЧ-2014да муваффақиятли иштирок этиши аввалдан тахмин қилинганди, кўрамиз гуруҳ босқичи қахрамони - Куадрадо ва унинг жамоадошлари мундиалнинг қайси босқичигача етиб боришар экан.

1. Голландия.

Уч учрашув ва уччовида ҳам ғалаба, ЖЧ-2014даги 10 та гол ва буни устига ҳозирги вақтда мусобақанинг безаги бўлиб турган ван Персининг испанлар дарвозасига йўллаган зарбаси. Буларнинг бари голландларнинг имкониятларидан дарак бериб турибди. Биринчи учрашувда голландлар амалдаги чемпион Испанияни шармандали тарзда мағлубиятга учратиб катта шов-ув кўтаришди. Якунда жаҳон чемпионатининг амалдаги ғолиби бўлган испанлар Бразилияни гуруҳдан чиқа олмай тарк этишди. Чили Висенте дел Боске шогирдлари устидан муздек сув қуйиб юборди. Мусобақа бошланишидан аввал Луи ван Гал қўл остидаги ёш жамоадан деярли ҳеч нарса кутилмаётганди. Аммо плей-оффга Голландия мусобақа фаворитларидан бири сифатидаги эътироф билан йўл олмоқда.

Манба: www.FAPL.uz