Замонавий футболнинг энг қаттиққўл мураббийи сифатида ном қозонган Феликс Магат ҳозирда «Фулхэм»ни қутқариш ҳақида ўйламоқда. Лондон клуби раҳбарияти жамоада атиги 2 ой ушланиб турган голландиялик Рене Меленстен (унинг «Анжи»даги мустақил фаолияти 2 ҳафтагина давом этганди) ўрнига «Темир Магат»ни танлаб, хато қилмаган кўринади. Ҳарқалай, жамоа ўйинида ижобий ўзгаришлар кўзга ташланмоқда. Шундай бўлсада, «Фулхэм»нинг премьер-лигада ўз ўрнини сақлаб қолиши жуда қийин, барибир. Шундай экан, АПЛда илк немис мураббийи сифатида ишлаётган Магат қандайдир каромат кўрсатиши керак. Унинг мураббийлик хусусиятлари ва кўрсаткичлари («Бавария» ва «Вольфсбург» билан чемпионлик) барчага маълум. Хуллас, тартиб-интизом ва жисмоний зўриқишларга асосланган иш услуби олдин ўз натижасини берган. Хўш, «Темир Феликс»нинг «Фулхэм»да иш юритаётганини қандай қабул қилишмоқда? «Айнтрахт»да немис мураббийи қўл остида тўп сурган Норвегия терма жамоаси собиқ футболчиси Ян Оге Фьортофт «Твиттер»даги шахсий саҳифасида бунга ўзига хос муносабат билдирди. Аниқроқ айтсак, у собиқ устози билан ҳамкорликда кузатилган баъзи бир қизиқ воқеаларни баён этди (манба: Sports.ru).

***
- Магат жамоа билан биринчи марта танишув чоғи кутилмаганда, «Айнтрахт»нинг энг тажрибали футболчиси ёнига яқинлашди-да, дабдурустдан ундан сўради: «Ўзи сен бу ерда нима қиляпсан...?»
***
- Жамоа футболчилари билан яна бир умумий учрашув. Магат шошилмай келди ва ўзига оҳиста чой қуйди, кейин уни чамаси 5 дақиқа ичида ҳўплаб-ҳўплаб ичди. Шундан сўнг ширинлик ейишга ҳам яна 5 дақиқа сарфлади. Ана шу вақт давомида лоақал битта сўз айтгани ҳам йўқ.
***
- Бир сафар Магат ўз олдига жамоадошларимдан бирини чорлади. У мураббий ёнига боргач, ўтириш ҳақида таклиф олди. Шундан сўнг Магат нақ 10 дақиқа ичида сукут сақлади ва ниҳоят, тилга кирди: «Энди кетишинг мумкин».
***
- Навбатдаги машғулотларидан сўнг Магат билан футболчиларни кўздан кечирганимизда, бир ўйинчи йўқлиги маълум бўлди. Шунда ҳамма уни қидиришга тушди ва «йўқолган» футболчи ҳушсиз ётган ҳолатда топилди.
***
- Агарда кимдир жароҳатланганини айтса, Магат бунга сира ишонмасди. У футболчи дарҳақиқат, лат еганига тўла ишонч ҳосил қилиш учун бечорани стадион бўйлаб 2 давра югуришга мажбур этарди.
***
- Бир сафар ўйин бошланишига чамаси 10 соат қолганида, машғулотдан чиқиб, «душ» қабул қилаётиб, беихтиёр қўшиқ куйладим. Буни Магат эшитиб қолибди. Ўйиндан сўнг у мени ҳузурига чорлаб, дарҳол ўшқирди: «Сен туфайли мағлубиятга учрадик. «Душ»да хиргойи қилиш мумкин эмас».
***
- Магат «Шальке»ни бошқарган пайти 2 нафар футболчининг ҳар бирига 10 минг евродан жарима солган. Улар қандай гуноҳ қилишган дейсизми? Оддий: бурчак тўпи амалга оширилаётганида, ўз жойларини алмаштиришган. Боз устига, бу воқеа танаффусга чиқиб кетишга атиги 1 сония қолганида рўй берган...

Манба: “Интерфутбол” газетаси