Афсуски, ЖЧ-2014га ОФК номидан борган Австралия терма жамоаси ҳам турнир билан гуруҳ босқичидан кейиноқ хайрлашди. Лекин Осиё чемпионатининг бўлажак мезбони барчада илиқ таассурот қолдиргани бор гап. Бу сафарги фотожамланмада айнан «Соккеруз»нинг юлдузларига эътибор қаратишни лозим топдик. Зеро, миллий жамоамиз улар билан ҳали кўп марта дуч келиши мумкин. Хусусан, Осиё кубоги чорак финалидаёқ. Демак, Sports.ru сайтининг қуйидаги фотогалереяси асносида бу йигитларни яхшилаб эслаб қўйсак зарар қилмайди.

Тим Кэйхилл. Авс-тралия термасининг биринчи рақамли юлдузи 34 ёшида ҳам мутлақо ақлни олувчи ўйин намойиш этишга қодирлигини исботлади. У аввалига чилиликларга ўзига хос услуб, яъни боши билан зарба берганча ажойиб гол «тортиқ» қилди. Ке-йин эса Голландия термаси дарвозасига шундай чиройли тарзда тўп йўлладики, бу гол бутун турнир безагига айланди. Афсуски, фахрий ҳужумчи дисквалификация сабаб, жамоасининг испанларга қарши охирги ўйинида иштирок этмади.

Майкл Единак. Англия чемпионатидаги энг енгилмас таянч ярим ҳимоячиларидан бири Бразилияда ҳам ўзлигини сақлаб қолди. Чили билан баҳсда Единак тўпни олиб қўйиш бўйича энг юқори кўрсаткичга эришди. Голландияга қарши учрашувда эса ҳужумни бузишда тенгсиз эканлигини кўрсатди. Австралия-Голландия ўйини сценарийсининг драма мисол кечишини таъминлаган пенальтини ҳам айнан Единак совуққонлик билан ижро этди.

Мэтью Лекки. Тезкор қа­нот ҳужумчиси ўтган мавсум иккинчи бундеслигада ўйнаб, «Франкфурт» учун 10та гол урди. У мундиалда ўнг қа-нот бўйлаб чўчимай юришларни амалга оширди, жамоасига бир қанча жарима зарбалари ишлаб берди. Натижада ҳақли равишда Голландияга қарши учрашувнинг энг яхши футболчиси, деб топилди.

Томас Оур. Бу ўйинчи ҳам Голландияда тўп суради - «Утрехт» клубида ва вазифаси чап қанот ярим ҳимоясини тартибга солиш. Тўғри, у ЖЧда айтайлик, Лекки каби ёрқин нур сочмади, лекин юлдуз рақибларидан сира ҳам чўчигани йўқ.

Оур ва Дэвидсон 22, Лекки эса 23 ёшда. Демак, Австралия термасининг келажаги чакки эмас.

Жейсон Дэвидсон. Голландиянинг «Хераклес» клубида ўйнайдиган чап қанот ҳимоячиси. Дэвидсон айниқса, Чили билан баҳсда яхши кўринди. У ҳужумларга қўшилишда жонбозлик кўрсатибгина қолмай, рақибни тўпсиз қолдиришда ҳам фаол ҳаракатланди.

Манба: FAPL.uz