2014 йилнинг 15 май куни Майкл Жексоннинг “Xscape” номли янги мусиқий альбоми сотувга чиқади – бу поп-қироли вафотидан кейин мухлислар эътиборига тақдим қилинажак иккинчи пластинкадир. Ушбу воқеага саноқли кунлар қолганида марҳум хонанданинг номи бошқа мавзу бўйича кун тартибидаги биринчи масалага айланди: “Фулхэм” клуби собиқ хўжайини ва Жексоннинг яқин дўсти Муҳаммад Аль-Файед мусиқачи ҳайкалининг қайта таъмирланиши лондон клубининг Премьер-лига билан хайрлашишига сабаб бўлгани ҳақида баёнот берди. 

Ҳа, бу фикр реал воқеликдан узоқдек жарангламоқда, аммо Жексон ва Англия футболини биз ўйлаганимиздан кўра кўпроқ нарсалар бирлаштириб турар экан.  

Ҳайкал қарғишига учраган “Фулхэм”

Мисрлик ишбилармон Муҳаммад Аль-Файедни АПЛдаги хорижлик клуб хўжайинлари учун ёрқин намуна деб ҳисоблаш мумкин. Сабаби у 1997 йили учинчи дивизионда иштирок этаётган “Фулхэм”ни харид қилиб олиб, 4 йил ичида жамоани АПЛ иштирокчисига айлантирганди. Қолаверса, клуб хўжайини ўз жамоасида нафақат футбол ўйнашни хуш кўрувчи, балки мухлисларга ушбу ўйин орқали қувонч улашадиган футболчилар тўп суришини истарди. Шу тариқа тафаккури ва хазил-мутойибага ўчлиги билан мухлислар ёқимтойига айланган Яри Литманен ва Мориц Фольц, Жимми Буллард ва Алексей Смертин, Клинт Демпси ва Димитар Бербатов бирин-кетин “Фулхэм” сафида муваффақиятли фаолият олиб боришди.

Футболдан ташқари вақтида Файед маҳаллий нашрларнинг бир зум бўлса-да нафас ростлаш учун имкон бермаганига қарамай (“Харродс” дўкони собиқ раҳбари билан судлашган, мураббий Жан Тиган билан юзага келган келишмовчилик ҳам суд маҳкамасигача бориб тақалган, ўз ўғли Доди ва қиролича Диананинг ўлимида британ разведкасини айблаган, Буюк Британия фуқаролигини қабул қилиш масаласида икки марта рад жавобини эшитган ва ҳ.к.) “Фулхэм”ни анча хотиржам бошқарган. Фақатгина бир марта клубни сотиб юборишдан икки йил аввал бироз кутилмаган ишга қўл урганди. 

Аль-Файед “Крэйвен Коттеж”га 1999 йил апрелида ташриф буюрган яқин дўсти Майкл Жексон ҳайкалини стадион атрофида ўрнатиш бўйича кўрсатма беради. Бу қарорни ҳайрат билан тинглаган қўл остидаги ходимларига қарата қатъий оҳангда: “Агар бу иш кимгадир ёқмаса – бу ердан туёғини шиқиллатиши мумкин. Менга бундай мухлислар керак эмас”, - деганди аль-Файед.

Шундай кейин Жексон ёдгорлиги стадион кираверишига ўрнатилди, аммо ташқаридан қараганда ҳақиқатдан ҳам ҳайкал стадион архитектурасига мос келмаганди. Уни масхара қилганлар, кимситганлар кўп бўлди, аммо уни очиқ чеҳра билан кутиб олганлар эса деярли топилмади. Шу сабабли ҳам клубни 2013 йил июлида Аль-Файеддан сотиб олган Шахид Хан ҳайкални қисмларга ажратиб ташлашга буйруқ берди. Аль-Файед аввалига буни ҳазил бўлса керак деб ўйлади, аммо май ойи бошида “Фулхэм” элитадан тушиб кетгач, эътирозини яшириб ўтирмади: “Ҳайкални олиб ташлашдию – жамоани омад тарк этди. Хан менга қўнғироқ қилиб, ёдгорликни қайтаришимни илтимос қилди, аммо энди бу ишдан фойда йўқ. Қилмишга яраша мукофот деб шуни айтишади”.

Албатта бу эътирозни фақат Жексон ҳайкалига эмас, балки клуб тарихида катта бурилиш ясаган, уни қуйи дивизиондан элитага олиб чиққан Аль-Файедга ҳурматсизлик белгиси сифатида қабул қилиш мумкин. Клубнинг аввалги хўжайини ҳам унинг саъй-ҳаракатларини қадрлашмагани учун юқоридаги аччиқ сўзларини айтганди.   

Майкл Жексоннинг “Крэйвен Коттеж”га ташриф буюриши фавқулодда тасодифий ҳодиса эмасди. Поп қироли болалигидан Англияга муҳаббат қўйганди. Айниқса, китоблар ва эртакларда ўқиганидек қадимий ва меҳмондўст, ёмғирли, чойхўр инглиз халқига меҳри ўзгача эди. Жексоннинг Калифорниядаги ранчоси Неверлэнд деб аталарди, худди Питер Пэннинг оролига ўхшаб. Бу ердаги инсонлар учун кексалик ва ўлим деган тушунчалар бегона эди. Инглиз маданияти уни ўзига оҳанрабодек тортарди – шу сабабли ҳам Жексон футболга умуман қизиқмаса-да, “Фулхэм” иштирокидаги футбол матчини томоша қилиш учун Лондонга ташриф буюришга рози бўлди, ўшанда лондон жамоаси учинчи дивизионда тўп сурарди.

2002 йили (“Фулхэм” бу вақтда Премьер-Лигада иштирок этарди) Жексон яна учинчи лига баҳсини томоша қилиш учун стадионда кўриниш беради. “Эксетер Сити” жамоасининг хўжайинларидан бири таниқли кўзбойлағич Ури Геллер Майклдан клуб учун маблағ тўплашга ёрдам сўраганди. Жексон фақат икки шарт билан илтимосни қабул қилади – бири тушган маблағнинг ярми бемор болалар учун сарфланиши керак эди, иккинчиси эса хотиржам футбол кўриш. Аммо барибир Жексон футбол матчини ўзи хоҳлагандек томоша қилолмади: 10 минг томошабин кўз олдида клубнинг фахрий директори сифатида таништирилган Майкл кучли ёмғир остида мухлислар билан мулоқотга киришади. 

Бу воқеани кейинчалик у шундай хотирлаганди: “Мен ҳозир ҳам футбол ҳақида ҳеч қандай тасаввурга эга эмасман, аммо “Эксетер Сити” ни яхши кўраман”. 

Рио ва Жексон ўртасида амалга ошмай қолган интервью

“Манчестер Юнайтед” клуби ҳимоячиси Рио Фердинанд шоу-бизнесда ўз омадини синаб кўриш учун футболдаги фаолияти якунини кутишни истамади. У 2000 йиллар ўрталариданоқ мусиқа билан шуғуллана бошлайди, орадан ҳеч қанча ўтмай эса ўзининг 5 номли журналини сотувга чиқаради, унда Фифти Сент, британия бош вазири Гордон Браун ва бошқа таниқли инсонлар билан суҳбатлар чоп этиларди. 2009 йил апрелида эса Рио телефон орқали Майкл Жексон билан қисқа вақт суҳбатлашади.

Ўшанда ёлғизликда яшаётган ва дунё бўйлаб турнега тайёргарлик кўраётган Жексон Фердинандга интервью беришга розилик билдиради. 

Рио кейинчалик ушбу воқеага изоҳ бераркан, болалигиданоқ Жексон қўшиқларини тинглаб катта бўлганини, қўшиқлар матнини ёддан билишин тан олади. Рио Жексон билан бўлган қисқа суҳбатдан сўнг ҳаяжон зўридан анча вақтгача ўзига келолмайди. Афсуски, ваъда қилинган интервью амалга ошмай қолади – орадан икки ой ўтгач Майкл дунёдан кўз юмади.  

“Уэмбли”ни ларзага солган Қирол 

Бу воқеа бироз ғалати тарзда рўй берганди: Жексоннинг Англиядаги бош аренада чиқиш қилиши футболга ҳеч қандай алоқаси йўқ эди. Аммо 1988 йил июлидаги 7 концертдан бири алоҳида аҳамият касб этади. Майкл ўшанда қиролича Диананинг илтимоси ва шахсан иштироки остида “Dirty Diana” қўшиғини ижро қилган, ушбу тарихий концерт видеоси эса кейинчалик омма эътиборига тақдим қилинганди.

Ҳа, муҳташам “Уэмбли” шонли тарихи давомида нафақат буюк футбол матчлари, балки тарихий концертларга ҳам гувоҳ бўлган. 

Манба: www.sports.ru