Ван Гал шогирдлари ўзлари учун энг қийин ўйинни ўтказиб бўлишди. Энди фақат финалда маъсулият босими уларга ҳалақит бермаса бўлгани.

Ҳа, Мексика терма жамоаси Голландия йигитлари йўлида учраши мумкин бўлган энг қўрқинчли рақиб эди. Ҳатто, Германиядан чўчимаса бўлади, чунки, уларнинг қандай ўйин кўрсатишини олдиндан билиш мумкин. Барчамизни Ван Гал бу йилги жаҳон Кубогига абсолют даражада энг зўр жисмоний тайёргарлик билан келган терма жамоага қарши қандай йўл тутиши жуда қизиқтирар эди.

Мексиканинг жуда кўп футболчилари тоғли ҳудудда улғайиб, мана шу ерда спорт билан шуғулланишади. Баландликка кўтарилиш, кислород камлигига кўникма, шундан сўнг пастга қараб учиб тушиш улар учун одатий ҳол. Мексикаликларга қарши нима қўлласанг, улар баттароқ тетик бўлиб тураверишади. Ўйин стартида тезликни ошириб кўрсанг, худди боксдагидек клинчга тайёр. Чап беради, сирғалиб чиқиб кетади (Бразилия-Мексика ўйинини эсланг). Бир марта хато қилсанг бас – нокаут (Мексика-Хорватия).

Ўз жарима майдонингга яшириниб олмоқчи бўлсанг, яна адашасан. Мексика таркибини ярмидан кўпи узоқдан зарба беришга ўргатилган. Бразилия майдонларида улар томонидан дарвоза томон берилган зарбаларнинг 70 фоизи жарима майдони ташқарисидан берилганлиги ҳам буни кўрсатиб турибди. Хорватия билан бўлган ўйиндаги гол ҳисобга кирмайди, чунки, хорватларнинг ўзи яқиндан зарба беришга имкон бердилар.

Ван Гал – тактик эмас, балки руҳий жиҳатларга бой режа тузди. Мексикаликларни ўзлари ҳис этиб турган жисмоний тарафдан кучли эканликларини синдириш зарур эди. Голландия ўз кучи ва энергиясини сарфламай биринчи бўлимни ўтказди. Иккинчи бўлимнинг ўрталарига келиб эса, нидерландлар темпни оширдилар. Мураббийни режаси иш берди. Фақат Ван Галнинг сценарийсида Дос Сантосни гол киритиши ҳисобга олинмаган эди.

Ҳа, фақат буюк жамоаларгина ўйинга мана шундай якун ясаши мумкин. Финиш байроғи кўриниб турган пайтда ғалабани илиб кетиш. Мексикаликлар рақибда шунча куч қолганидан ҳайрон қолишди. Бу жамоа турнир давомида, ҳатто Бразилияга қарши ўйинда ҳам бундай ҳолатга тушмаган эди.

62 ёшли Луи Ван Гал барчамизга Голландия билан тактика бу 4-3-3 эмас, балки фантазия ва майдонда фикрлар оламини яратиш қандай бўлишини кўрсатиб берди.

Тўғриси, хоккей томоша қилмаганимга анча вақт бўлди. Голландлар ўйинини кўриб, бир вақтлар АҚШда фаолият юритган Буре деб аталмиш рус хоккейчисини ўйинларини яна эслай бошладим. Арьен Роббен – бу Буренинг энг гуллаган пайти. Милтиқ ўқи даражасидаги тезлик. Роббеннинг бир ўзи голланд футболидаги гўзал жиҳатни очиб бера олмайди. Қарши ҳужум – санъат асари даражасидаги ижро. Роббен, Снейдер, Ван Перси – хоҳлаган куйига импровизация қила оладиган жаз-трио.

Ван Гал ажойиб футболчи - Дирк Кюйтга майдонда жой топиб бера олди. Мураббий яхши билади, Кюйт энди ҳеч қачон “Ливерпул”даги сингари ўйин кўрсата олмайди. Лекин, Ван Гал бу ўйинчида бир малака сақланиб қолганини билади. Кюйт икки бўлим чарчамасдан чап йўлакни чопиб қўриқлаши мумкин.

Ҳўш, энди мақсадга кўчсак – Голландия мундиал чемпиони бўла оладими? Нега бўлмасин? Бразилия ва Аргентина термаларини плей-оффдаги ўйинларини кузатгач, уларни енгиб бўлмас жамоалар сафидан ўчирдик. Ҳар иккаласи ҳам тепаларидаги омад қуши парвози боис кейинги босқичга чиқди. Мақоламиз қаҳрамони Голландия энди Коста-Рика тўсиғидан ўтиши керак. Ў ёғига Аргентина ёки Бельгия.

Агар Ван Гал ўз тактикасидаги бир ўйинга эътибор берса, балки яхши бўлар эди. Нимагадир, Голландлар биринчи бўлимда яхши ўйнашмайди. Иккинчи бўлим ўрталаридан эса ҳаракатга туша бошлайдилар. Агар бу мураббий томонидан ўйланган тактиканинг бир бўлаги бўлса, Коста-Рика биринчи бўлимда тезликни кўтаргач, уларга етиб олишни ўзи қийин. Об-ҳаво, иқлим ва намликнинг юқорилиги муаммолари европаликларга оғирлик қиляпти. Менимча, голландлар иссиқда тўп суришга мослашиб ҳам қолишди.

Турнирдаги барча термалар мухлисларини ранжитмаган ҳолда, фикримни якунлайман. Бу йилги Голландия ўз таркиби, кўрсатаётган ажойиб ўйини билан чемпионлик тожини кийишга ҳақли десак, муболаға бўлмайди. Бу ҳам энди бир тахмин. Қолганини эса, голландларни ўзи майдонда исботлайди. Кутамиз...

Манба: FAPL.uz