Бу йилги жаҳон чемпионати ҳам аввалгилари каби ҳакамларнинг асосий планга чиқиши билан ажралиб турибди. Балки, ўзбекистонлик ҳакамнинг у ердаги иштироки учун ҳамюртларимизга бу мавзу яқинроқдек туюлаётгандир, деб ўйлаб қоламан баъзан. Кейин интернетни титкилаб жаҳон чемпионатининг энг аҳамиятли воқеалари ҳақида қидирув берсам, Бразилиядаги тартибсизликлар, Суареснинг тишлаши, Европа гигантларининг мағлубиятлари қаторида ҳакамлар мавзуси ҳам чиқиб келади. Жаҳон чемпионатида Равшан Эрматов ва Абдулҳамидулло Расуловлар Ўзбекистон номидан чиқаётган экан, биз улар ҳақидаги ҳар бир маълумотни қизиқиш билан ўқийверамиз. Ана шу ўқиганларим асосида қоғоз қоралашга ҳаракат қилдим. 

Аслида Швейцария Эрматовдан миннатдор бўлиши керак 

Эквадор ва Швейцария терма жамоалари иштирокидаги учрашувдан сўнг “соатсозлар”дан айримлари тоза голни ҳакам ҳисобга олмаганини айтиб ўтишганди. Блаттернинг юртдошларига нисбатан бундай ҳакамлик қилиб бўлмайди, албатта. Ўша вазиятда оффсайднинг йўқлилиги аниқлаш ўшлик Баҳодир Қўчқоровнинг зиммасидаги вазифа эди. Лекин, Эрматов ўйин сўнгида швейцарияликларнинг ҳужумни давом эттириши учун имконият яратиб уларнинг гол уришига сабаб бўлди ва жамоа плей оффга чиқди. Агарда шу вазиятда, майдон марказида юзага келганди бу тўқнашув, Эрматов ўйинни тўхтатиб жарима белгилаганида ҳам у қоидалар бўйича ҳақ бўлиб қолаверарди ва Швейцария голни ура олмаслиги ҳам мумкин эди. Блаттернинг юртдошлари Равшан Эрматовга раҳмат айтишлари керак. 

Пенальти бормиди 

Мексика ва Хорватия эса бу бутунлай бошқа масала. Ўйинда агарда Мексика терма жамоаси ғалаба қозонмаганида Равшан Эрматов жуда катта танқид босими остида қолиб кетган бўларди. Лекин, бу сафар ҳам Эрматовнинг омади келди. Хорватиялик футболчилар икки марта қўл билан ўйнаганида ҳам ҳакам ўйинни тўхтатмади. Бу қизиққон мексикаликларнинг қонини янада қайнатгани табиий. Биринчи бўлимдаги вазиятда тўп хорват футболчисининг қўлига теккан, лекин, бу лайнсменнинг (А.Расулов) ҳудуди эди ва бу ҳолатда кўпроқ ён ҳакамнинг масъулияти катта эканини айтамиз, холос. Иккинчи бўлимда, жарима майдончаси ичида хорватиялик футболчининг қўлига тўп текканда Эрматов вазиятга яқин турган эди. У ҳаммасини кўрди, тўп ўз йўналишида йиқилаётган футболчининг қўлига тегди. Футболчи эса ўзи истасада, қўлини тортиб ола билмасди. Бу пенальти эмас. 

Равшан Эрматов Валентин Иванов эмас 

Бу ўйин ҳакамлик нуқтаи назаридан жуда мураккаб кечди. Ўйин дебютида хорват Иван Ракитич бош ҳакамнинг қўлидан тортгани учун сариқ карточка билан жазоланганидан сўнг ҳам хорватлар хулоса чиқаришмади. Улар жуда кўп бор жанжал чиқаришга уриниб кўришди. Ҳакам ўйинни “сариқ карточкалар ёмғири”га айлантириши мумкин эди. Агарда россиялик Валентин Иванов бўлганида бу ўйиндаги қоидабузарларни роса бопларди. Бироқ, Эрматов ўйинда бор йўғи учта сариқ билан чекланди. Можароларни куч ишлатмасдан, дипломатик йўл билан бутун ўйин давомида ҳал эта олди. Ва ўйин охирида Ребичнинг майдондан четлаштирилиши Эрматов ҳакамлигининг энг классик кўриниши бўлди. Юқори класс! 

АҚШ ва Германия термалари ўйини эса ҳакамлик учун катта босимни юзага келтиргани йўқ. Бу ҳам бош ҳакамнинг ютуғи. 

Гуруҳ босқичида ўтказган учта учрашувидан сўнг Равшан Эрматов финални бошқариш учун асосий даъвогарлар қаторидан ўрин эгаллаб турибди. Нима ҳам дердик, боболаримиз айтганидек, узоғидан қувонтирсин!