Кучли бешлик якунларига оид мақолалар туркумиз давом этади. Ҳам гол уриб, ҳам голларга ҳаммуаллифлик қилган қолда, жамоасига фойда кжелтирган футболчилар ТОП-10 лигини сизнинг ҳукмингизга ҳавола қетамиз.

10. Лука Тони («Верона») 20 + 8 = 28 (34 ўйин)
Италиялик қария ҳужумчи ушбу мавсум ўзининг иккинчи ёшлигини ўтказди. Тони камтарона «Верона» жамоасида ҳаракат қилишига қарамасдан Италия А сериясидаги энг фойдали футболчига айланди. Лука чемпионат доирасида 20 та гол уриб, 8 та голга аниқ узатмани амалга оширди ва умумий ҳисобда 28 очкони қўлга киритди. Бунинг учун ҳужумчига 34 учрашув кифоя қилди. Ҳа, афсуски мана шундай натижалар ҳам унга Мундиал эшикларини очмади.

9. Яя Туре («Манчестер Сити») 20 + 9 = 29 очко (35 ўйин)
Яя Туре «Сити»нинг чемпион бўлишида жуда катта ҳисса қўшди. Ярим ҳимоячи бўлишига қарамасдан Премер лигада 20 та гол муаллифига айланди ва бу борада шаҳарликлар етакчисига айланди. Шунингдек Яя 9 та голли узатмани ҳам амалга оширди. Туре умумий ҳисобда гол+пас тизимида 29 очко жамғарди.

8. Марко Ройс («Боруссия Дортмунд») 16 + 13 = 29 очко (30 ўйин)
Ройс Бундеслиганинг энг фойдали футболчисига айланди. Марко «Боруссия» таркибида чемпионатда 30 та учрашувда иштирок этиб, 16 та голга муаллифлик қилди ва 13 та голга ҳаммуаллифлик вазифасини бажариб берди. Унинг тўплаган очколари сони ҳам 29 тани ташкил қилди. Ажаб эмас ярим ҳимоячи келгуси мавсумни суперклублардан бири сафида бошласа.

7. Даниел Старридж («Ливерпул») 22 + 7 = 29 очко (29 ўйин)
Старридж ниҳоят ўз жамоасини топди. «Сити» ва «Челси»да асосий таркибга кира олмаган ҳужумчи «Ливерпул»да Суарес билан ажойиб тандем ҳосил қилиб, Премьер лига ҳимоячиларини қўрқувга солди. Даниел 29 ўйинда 22 гол уриб, 7 та голга ҳаммуаллифлик қилди ва 29 очко жамғарди. Ўртача ҳар ўйинда ё гол урган, ё голли узатмани амалга оширган.

6. Диего Коста («Атлетико») 27+3=30 (35 ўйин)
«Атлетико» ҳар мавсум супер ҳужумчиларни футбол жамоатчилигига таништиради. Торрес, Агуеро, Форлан ва Фалкаолардан сўнг катта саҳнага Коста чиқади. Диего малум вақт оралиғида тўпурарлар пойгасида Роналду ва Мессини орқада ҳам қолдирди. Бразил/испан ҳужумчи 27 тўп киритиб, 3 та голли пас берган. Умумий очколари сони эса 30 тани ташкил қилди.

5. Алексис Санчес («Барселона») 19+11=30 (34 ўйин)
Санчес Месси жароҳат олган пайтлари «Барселона»нинг асосий ҳужумчисига айланган эди. Чилилик ҳужумчи Премьеро баҳсларида 19 бора рақиблари посбонларини хафа қилган бўлса, 11 марта жамоадошларининг гол киритишларида сўннги аниқ тўпни узатиб берган. Мавсум давомида гол+пас тизимида 30 очко жамғарган футболчини, трансферга қўйилиши адолатданмикан?

4. Златан Ибрагимович («ПСЖ») 26 + 11 = 37 очко (33 ўйин)
Швециялик ҳужумчи иккинчи мавсумдирки Францияда энг фойдали футболчига айланмоқда. 33 учрашувда майдонга тушган Ибрагимович 26 гол киритиб, 11 голга ассистентлик вазифасини бажариб берди. Афсуски Ибра мана шундай супер мавсумни ўтказган бўлса ҳам, жамоаси билан Мундиал йўлланмасини қўлга кирита олмади.

3. Лионел Месси («Барселона») 28+11=39 (31 ўйин)
Деярли икки ой футбол ўйнамаган бўлса ҳам Лео кучли бешликдаги энг фойдали футболчилар рўйҳатида 3-ўриндан жой олди. Месси 31 учрашувда 28 гол уриб, 11 та аниқ узатма амалга оширди ва 39 очко жамғарди. Лионел ўтган икки йил давомида 50 ва 46 тадан гол урганлигини инобатга оладиган бўлсак, бу аргентиналик футболчининг сўннги йиллардаги энг омадсиз мавсумига айланди. 

2. Криштиану Роналду («Реал Мадрид») 31+9=40 очко (30 ўйин)
Роналду Испания чемпионати тўпурарлигини қўлга киритган бўлса ҳам, чемпионликка эриша олмади. Кришга ҳам жароҳатлар жуда кўп панд берди. у 30 ўйинда 31 гол киритиб, 9 та голга ҳаммуаллифлик қилди. Жамлаган 40 очкоси унга Кучли бешликдаги энг фойдали иккинчи футболчи бўлишини таъминлаб берди.

1. Луис Суарес («Ливерпул») 31 + 12 = 43 (33 ўйин)
Уругвайлик ҳужумчи Кучли бешликнинг энг фойдали футболчисига айланди. Суарес бу йўлда Роналду ва Месси каби ХХI аср футбол қиролларини ортда қолдирганлигини алоҳида таъкидлаб ўтиш жоиз. Луис 33 учрашувда 31 бора ўз номини тоблога ёздириб қўйди. Шунингдек 12 марта жамоадошларининг гол киритишида охирги аниқ пасни берган. Умумий тўплаган очколари сони 43 тани ташкил қилди. Суарес бу йили «Олтин тўп» учун кураш олиб борса ажаб эмас.

Юсупов Фурқат