Бугун Англия Премьер Лигаси 11-тур ўйинлари давом эттирилади. Шубҳасиз, миллионлаб футбол ишқибозларининг нигоҳи "МЮ” - "Арсенал” тўқнашувига қаратилади. Биз эса анъанамизга содиқ қолиб ушбу ўйинларга бағишланган анонси эътиборингизга ҳавола қиламиз.

АПЛ.

11-тур.

Тоттенхэм - Ньюкасл

10 ноябрь. «Уайт Харт Лэйн», 17.00.

Бош ҳакам: Крис Фой

Жароҳатланганлар: Роуз, Шадли / Колоччини, Ст.Тэйлор, Р.Тэйлор, Даметт, Р.Тэйлор, Тиоте, Хаидара

Дисквалификация: йўқ

«Тоттенхэм» (тахминий таркиб): Льорис – Уокер, Кирикеш, М.Досон, Вертонген – Паулиньо, Сандро – Таунсенд, Холтби, Ламела – Сольдадо.

«Ньюкасл» (тахминий таркиб): Крул – Дебюши, Уильямсон, Янга-Мбива, Сантон – Бен Арфа, Анита, Кабай, Гуффран — Реми, Сиссе.

Ўтган мавсумдаги ҳисоб: 1:2 («Сент-Жеймс Парк»), 2:1 («Уайт Харт Лэйн»).

Охирги 5 ўйиндаги натижалар: = – + + = / – + = – +

Ламела, Сигурдссон ёки Леннон?

Европа Лигасида "Шериф”га қарши учрашувни жуда кўтаринки кайфиятда ўтказган Эрик Ламела янги клуби сафидаги дебют голини нишонлади.

Аслида унинг "Уайт Харт Лэйн”даги фаолияти омадли бошланмаганди. Жамоа устози Андре Виллаш-Боаш аргентиналик футболчини асосий таркиб вакилига аста-секин мослаштирмоқчи эди. Бироқ Премьер Лигадаги шиддатли ва муҳим учрашувлар ушбу режани бироз ортга суришга мажбур қилди. Жамоанинг Европа Лигасидаги иштироки айнан таркибдан муқим ўрин ола билмаётган ўйинчиларга ўзини кўрсатиш имконини тақдим қилмоқда.

Лондонликлар сўнгги вақтда ҳужумларни ташкил қилиш ва уларни самарали якунлаш борасида муаммоларга дуч келяпти. Ғалаба қозонган ўйинларда ҳам "шпорлар” рақиб посбонини атиги 1 марта, кўпи билан 2 марта "хафа” қилишни уддалашмоқда.

Ўнг қанотда тиним-билмай фақат чизиқ бўйлаб югураётган Таунсенднинг ҳаракатларини фақат олишлаш керак. Бироқ нариги қанотда Леннон ва Сигурдссон ана шундай фаолликни кўрсата олмаяпти. Шу нуқтайи назардан фикр юритилса, ЕЛ сўнгги тури қаҳрамонларидан бирига айланган Ламела бугунги баҳсни асосий таркибда бошлаши мумкин.

"Ньюкасл” эса аввалги турда Лондоннинг бошқа клуби "Челси”ни ишончли тарзда мағлубиятга учратиб (2:0), анча шов-шув кўтарди. Жорий мавсумда бир текис ўйин кўрсатмаётган Алан Пардью шогирдлари турнир етакчиларига қарши баҳсларда жонларини бериб ҳаракат қилишмоқда. Мавсум стартида "Ливерпуль” айнан "Ньюкасл” билан бўлган учрашувда қимматли 2 очкони қўлдан чиқарганини ёдга олсак, бугунги баҳс шундоқ ҳам айрим муаммоларга ўралишиб қолган "Тоттенхэм” учун осон кечмайди.

Сандерленд — Манчестер Сити

10 ноябрь. «Стэдиум оф Лайт», 19.05.

Бош ҳакам: Майк Дин

Жароҳатланганлар: Вествуд / Компани, Сильва, Йоветич

Дисквалификация: Доссена, Кэттермол / йўқ

«Сандерленд» (тахминий таркиб): Манноне — Бардсли, Браун, О’Ши, Колбэк — Борини, Кр.Гарднер, Ки Сон Ен, Жаккерини — Ст.Флетчер, Алтидор.

«Манчестер Сити» (тахминий таркиб): Пантилимон — Сабалета, Демичелис, Настасич, Клиши — Фернандиньо, Я.Туре — Навас, Агуэро, Насри — Негредо.

Ўтган мавсумдаги ҳисоб: 0:3 («Этихад»), 1:0 («Стэдиум оф Лайт»).

Охирги 5 ўйиндаги натижалар: – – – + – / – + + – +

Агуэронинг кейинги "қурбон”и "Сандерленд”

АПЛнинг октябр ойидаги "энг яхши ўйинчи” совринини "Арсенал” юлдузи ва кашфиёти Аарон Рэмсидан тортиб олиш йўлида Серхио Агуэро 3 ўйинда 4 та гол урди, 2 бор самарали тўп узатишни амалга оширди.

Фаолиятида илк марта ана шундай юксак эътирофга сазовор бўлган аргентиналик форвард янада шижоат билан тўп сурса ажабмас. Айтишадику, "иштаҳа тановул пайтида келади” деб. Қўшимчасига, шахсий совринлар футболчининг ўз кучига бўлган ишончининг ортишига хизмат қилишинини унутмаслик керак. Шундай экан, "Сандерленд” ҳимоячилари нафас ростлашга вақт топишмайди.

Мануэль Пеллигрини қўл остида "шахарликлар” меҳмондаги учрашувларда ҳам ғалаба қозонишга одатланишди. Жамоанинг айни вақтдаги кайфияти ҳам аъло даражада. Ўтган турда рақибини йирик ҳисобда доғда қолдирган "Манчестер Сити” футболчилари бугун ҳам майдонга фақат ғалабани кўзлаб тушишса керак. Кеча "Челси”нинг ўз майдонида дуранг қайд этгани ҳам уларга қўшимча шижоат бағишлашиши турган гап.

Суонси — Сток Сити

10 ноябрь. «Либерти Стэдиум», 21.10

Бош ҳакам: Роберт Мэдли

Жароҳатланганлар: Монк, П.Эрнандес, Мичу / Уилкинсон

Дисквалификация: Ворм / йўқ

«Суонси» (тахминий таркиб):Треммель — Ранхель, Чико, Э.Уильямс, Н.Тэйлор — Бриттон, Шелви — Раутледж, де Гузман, Дайер — Бони.

«Сток Сити» (тахминий таркиб): Бегович — Кэмерон, Хут, Шоукросс, Питерс — Паласиос, Нзонзи — Уолтерс, Айрленд, Арнаутович — Крауч.

Ўтган мавсумдаги ҳисоб: 0:2 («Британия»), 3:1 («Либерти»).

Охирги 5 ўйиндаги натижалар: – – + = – / – – = – =

Ворм ва Мичусиз "Суонси” ўзини кўрсата оладими?

Аввалги турда уэльс тарихидаги илк дербида "Кардифф”га енгилган "оққушлар” бугунги баҳсда икки асосий футболчиси хизматидан фойдалана олмади.

Биринчи рақамли дарвозабон Ворм ўтган турда қизил карточка билан "сийланган” бўлса, ҳужум чизининг етакчи вакили Мичуни жароҳат безовта қилмоқда.

Вормнинг дублёри германиялик дарвозабон Треммелнинг маҳоратига ҳеч қандай шак-шубҳа бўлмаслиги керак. Айнан у "Суонси”ни Лига Кубогида ғалаба сари бошлаб борганди. Бироқ ҳужумчи борасида бош мураббий қаттиқ қайғуриши аниқ. Эҳтимол, Вилфред Бони ўзини кўрсатишга имкон топар?

Манчестер Юнайтед — Арсенал

10 ноябрь. «Олд Траффорд», 21.10.

Бош ҳакам: Майкл Оливер

Жароҳатланганлар: Эванс, Рафаэль, Д.Флетчер, Уэлбек / Диаби, Саного, Подольски

Дисквалификация: йўқ

«Манчестер Юнайтед» (тахминий таркиб): Де Хеа — Смоллинг, Р.Фердинанд, Видич, Эвра – Ф.Джонс, Кэррик — Валенсия, Руни, Янузай — ван Перси.

«Арсенал» (тахминий таркиб): Шченсны — Санья, Косьельни, Мертезакер, Гиббс — Артета, Рэмзи — Росицки, Озил, Касорла — Жиру.

Ўтган мавсумдаги ҳисоб: 2:1 («Олд Траффорд»), 1:1 («Эмирейтс»).

Охирги 5 ўйиндаги натижалар: – + = + + / + = + + +

РВП ва Руни vs "Арсенал”

Аввалига ўтган турда "Арсенал” ўта даҳшатли кучга айланган Суарес-Старриж жуфтлигини зарарсизлантирди. Кейин эса Европа Чемпионлар Лигаси гуруҳ босқичида меҳмонда "Дортмунд”ни мағлубиятга учратди. Ройс-Левандовски тандеми Лондонлик ҳимоячилари учун у қадар ташвиш туғдира олмади. Энди эса навбат "Манчестер Юнайтед”, "Олд Траффорд” ва Руни билан ван Персига етиб келган кўринади.

Уэйн фаолияти давомида "тўпчилар” дарвозасини 10 марта ўққа тутган. Унинг ҳужумдаги шериги Робин жароҳатидан қайтгач 3 ўйиндан 3 бор рақиб дарвозасини ишғол қилди. Жамоа устози Дэвид Мойес РВП ва Рунининг айни вақда юқори спорт формасида эканини айтиб, уларни мақташда давом этмоқда.

Ушбу грандар ўртасида бўлиб ўтган сўнгги 12 тўқнашувда пойтахтликлар фақат 1 бор зафар қучгани "Юнайтед” имкониятини ошириши мумкин. Бироқ футболда рақамлар эмас, балки майдондаги футболчилар ҳамма нарсани жой-жойига қўяди.

Энг муҳими, бугун Арсен Венгер жамоаси "Олд Траффорд”га чемпионат пешқадами сифатида ташриф буюради. Мезбонлар эса айни вақтда мусобақа жадвалида ўзлари учун ярашмайдиган поғонанини банд этишган.

Ўйин арафасида "Арсенал” вакиллари томонидан билдирилган кўплаб фикрларни умулаштирсак, жамоа бугун фақат ғалаба қозониш учун майдонга тушади, бошқа натижа уларни асло қониқтирмайди.

Иккинчи томонда эса сер Алекс Фергюссондан сўнг жамоа бошқарувини қўлга олиб, фақат танқидлар ёмғирида қолаётган Дэвид Мойес тажрибали рақибини доғда қолдириб, ўзини ҳимоя қилишни дилига тукан.

Майдонда эса Робин ван Перси - Руни ҳамда Ўзил – Ремси қарама-қаршилиги ҳам мураббийлар ўртасидаги баҳсдан кам бўлмаган шиддатни тақдим қилиши кутилмоқда.

Демак доимгидек барча масалага яшил майдон ва 90 дақиқа вақт ойдинлик киритиб беради.

Манба: www.sports.ru