«Арсенал» бош мураббийи Арсен Венгер "Уиган"га қарши бўлиб ўтган Англия кубоги ярим финал учрашувидан кейин ўз фикрларини билдириб ўтди (1:1, пенальти бўйича – 4:2).

«Энди енгил нафас олишим мумкин. Боиси, жамоа катта босим остида қолганди. Ўйин қийин ўтишини кутгандим. «Уиган» улкан таассурот қолдирди. Улар жуда уюшқоқ ўйин кўрсатишди, жисмоний кучдаги устунликдан фойдаланишга ҳаракат қилишди. Лекин биз характер кўрсата олдик. 

Финалга чиқишимиз муҳим аҳамиятга эга эди. Акс ҳолда, мағлубият хунук оқибатларга олиб келиши мумкин эди. «Эвертон» қандай ўйнаганини билмайман. АПЛнинг қолган ўйинларида ғалаба қозонсак, тўртликка кирамиз, деб ўйлайман. Ҳозирда барча эътиборни Премьер-лига ўйинларига қаратамиз. Шубҳасиз, Англия кубогини қўлга киритиш мақсадимиз бор, аммо ҳозирча чемпионат ҳақида ўйлаш лозим. 

Бугун «Уиган» нима учун «Манчестер Сити»ни чорак финалдан чиқариб юборганини кўрсатди. Ўйин давомида барча нарса бизнинг зараримизга ишлаётгандек кўринганди, аммо биз характер, ирода намойиш қилдик ва Англия кубоги финалига чиқдик», –  дейди Венгер.