Бразилияда бўлиши кутилаётган жаҳон чемпионати аввал футбол билан умуман иши бўлмаган одамларнинг ҳам эътиборини ўзига жалб қилди. Букмекерлик идоралари ҳам бу ишдан чеккада қолмай, улар қиморли ўйинлар ишқибозларига келаётган мундиалнинг энг ақлга тўғри келмайдиган, ҳатто фантастик ҳодисаларига пул тикишни таклиф этмоқдалар. «Лента.ру» энг ғалати ставкалар шарҳини тақдим этади.

Англия кўз ёшлари

Буюк Британия айниқса ўз терма жамоаларини алоҳида иштиёқ билан масхара қиладилар. Кўпчилик «уч шерлилар»га Уругвай, Италия ва Коста-Рика жамоаларига қарши гуруҳ босқичидаёқ мусобақани тарк этишларини тахмин қилишдан ташқари улар Англия терма жамоаси футболчиларидан бирининг йиғлаш эҳтимолини ҳам башорат қилганлар.

Жаҳон чемпионатини тарк этиш пайтидаги инглиз ўйинчисининг кўз ёшларини тошбағир букмекерлар 1.4 коэффициенти билан баҳоламоқдалар. Агар Бразилияга Рой Хожсон бошчилигида йўл оладиган жамоанинг ўртача ёши анча кичиклигини ҳисобга олсак, бу натижа эҳтимолдан холи эмаслигини эътироф этиш лозим. Бу кўрсаткич – 26 ёшу 117 кун. Рекорд 2006 йилда ўрнатилган бўлиб, ўшанда Германия термасининг ўртача ёши 25 ёш 258 кун бўлган.

Марадонанинг сеҳрли қўли

Букмекерлар инглиз футболчиларининг кўз ёшлари билан чекланмай, Диего Марадонанинг 1986 йилги ЖЧда Англия билан учрашувда қўли билан урган машҳур голи каби вазият такрорланишига ҳам ставкалар қабул қилмоқдалар. Ўшанда аргентиналик футболчи тўпни Питер Шилтон дарвозасига қўли билан киритган эди. Бир неча дақиқа ўтиб, Диего Армандо тўп билан бутун Англия ҳимоясини ёриб ўтиб, инглизлар дарвозасига иккинчи тўпни, яъни асрнинг энг буюк ва машҳур голини киритган эди. Бу тўп «альбиселесте»ни мундиал ярим финалига олиб чиқиб, охир-оқибатда улар чемпион бўлишга эришдилар.

Диего Марадона Англия термаси дарвозасига иккинчи тўпни киритмоқда, 1986 йилнинг 22 июни

Агар тўп Англия термаси дарвозасига яна қўл билан киритилса, бахти чопган одам ҳар бир тиккан долларига қўшиб яна 50 доллардан ютиб олади.

Соғлом ақл ва мустаҳкам хотира

Хорватия ҳимоячиси Йосип Шимуничга инглиз арбитри Грэм Полл томонидан ЖЧ-2006 да кўрсатилган учта сариқ карточка футбол тарихидаги ҳакамларнинг энг кулгили хатоларидан бири сифатида умрбод қолди. Ҳакам айбдор ва жазоланган ўйинчини майдондан ҳайдаб юборишни унутиб қолган, ўйинчи эса бунинг ҳаёлот ёки ўнг эканлигини тушунмай қолган эди.

Ҳакам Грэм Полл Хорватия — Австралия ўйинида, 2006 йилнинг 22 июни

Бу каби ҳодиса такрорланганида ҳам яхшигина пул ишлаб олиш мумкин: исталган терманинг ўйинчиси унга кўрсатилган икки сариқ карточкадан сўнг майдондан ҳайдалмай қолиш эҳтимолининг коэффициенти бирга юз.

Ўттиз учинчиси ортиқча

Ирландиянинг Буюк Британияга қарши мустақиллик учун урушининг юз йиллиги яқинлашиб келаётганлиги ҳам инглиз букмекерларининг ёдидан кўтарилмаган экан. Улар бу санага ғаройиб ставка белгилаб, унда Ирландия терма жамоаси қандайдир ғайри табиий йўл билан Бразилиядаги жаҳон чемпионатининг 33-жамоасига айланиши мумкин деган фараз учун гаров ўйнашни таклиф этмоқдалар. Саралаш босқичини омадсиз якунлаган «яшиллар армияси» ҳатто Австриядан ҳам ўтиб кета олмаган. Аммо улар бирор сабаб билан жаҳон чемпионатида қатнашиш ҳуқуқига эга бўлсалар, ҳар бир тикилган доллар эгасига яна 400 доллар “туғиб бериши” тайин.

Телба Игги

Букмекерлар ғалати қилиқлари билан ном қозонган колумбиялик голкипер Рене Игитанинг “қаҳрамонлигини” ёдга туширишга қарор қилган кўринадилар. У 1995 йилнинг сентябрида Англияга қарши ўртоқлик учрашувида футбол тарихида биринчи бор тепадан келаётган тўпни умбалоқ ошиб сакраб, оёғи билан қайтарган, бу усул ўшанда “чаён зарбаси” номи билан машҳур бўлган эди.

Голкипер Рене Игита “чаён зарбаси”ни ижро этмоқда 

Бўлғуси жаҳон чемпионатида ана шу каби трюк такрорланишига 66 коэффициенти берилган. Бунда ана шу ҳодиса ўйиннинг асосий вақтида рўй бериши шарт.

“Дори” ёрдам қилармикан?

Футбол бўйича сўнгги учта жаҳон чемпионати (2010, 2006 ва 2002) футболчиларнинг тақиқланган препаратларни истеъмол қилиши билан боғлиқ жанжалларисиз кечди. Букмекерлар Бразилияда ана шу серия давом этишига пул тикишни таклиф этмоқдалар.

Исталган терма жамоанинг допинг-тестда “қўлга тушишига” 6.0 коэффициенти билан пул тикиш мумкин, аммо пул ютуғининг эгаси бу ўз мамлакати вакили туфайли рўй беришини асло истамаса керак.

Why always me?

Марио Балотелли қаерда ўйнамасин, у Англия чемпионати бўладими, ё Европа биринчилиги ёки ўртоқлик учрашувими, бу ҳужумчи ўзига эътибор жалб этиш услубини топа олади. 2011 йили “Сити” да тўп суриб юрган Балотелли Манчестер дербисида гол урганидан сўнг, ўз ютуғини ички кийимига ёзилган «Why always me?» («Нима учун ҳар доим мен?») ёзуви билан нишонлаган бўлса, Европа чемпионати ярим финалида форвард Германия термасига урган голидан сўнг томошабинларга ўз мушакларини намойиш этган.

Марио Балотелли «Манчестер Юнайтед»га қарши учрашувда, 2011 йилнинг 23 октябри

Балотеллининг навбатдаги голини нишонлашига букмекерлар 3.75 коэффициенти берганлар. Марио – «Скуадра Адзурра»нинг зарба берувчи асосий кучи эканлиги ҳисобга олинса, бу Италия термаси ишқибозлари учун турнирга бўлган қизиқишни кўтаришнинг ўзига хос усулларидан бири бўлса керак.